ALPHA League-ի մինչեւ 17 տարեկաններու ֆութպոլի մրցաշարքի աւարտական հանդիպումը տեղի ունեցաւ «Champville» մարզադաշտին մէջ՝ Հ.Մ.Մ. Աքատէմիի եւ EFP (Eleven Football Pro) խումբին միջեւ։
Բարձր մակարդակի մրցակցութեամբ եւ հետաքրքրական պայքարով յատկանշուած հանդիպման, Հ.Մ.Մ. Աքատէմին գերազանց խաղ ցուցաբերելով 4-1 արդիւնքով յաղթանակ արձանագրեց եւ արժանիօրէն հռչակուեցաւ մրցաշարքի ախոյան։
Հանդիպումը անցաւ մեծ ոգեւորութեան մթնոլորտի մէջ եւ արժանացաւ մարզասէրներու բարձր գնահատանքին։ Հ.Մ.Մ.-ի երիտասարդ մարզիկները իրենց կարգապահ խաղով, մարտական ոգիով եւ խմբային ներդաշնակութեամբ անգամ մը եւս հաստատեցին ակումբին մարզական բարձր մակարդակը։
Այս առիթով կը շնորհաւորենք մարզիկները, մարզիչներու կազմը եւ բոլոր պատասխանատուները, որոնց հետեւողական եւ նուիրեալ աշխատանքին շնորհիւ Հ.Մ.Մ.-ը կը շարունակէ արձանագրել նոր յաջողութիւններ ու մարզական նուաճումներ։
Այս ախոյանական տիտղոսը եւս մէկ արժէքաւոր յաւելուած է Հ.Մ.Մ.-ի մարզական հարուստ աւանդին՝ մաղթելով նոր յաղթանակներ եւ աւելի մեծ նուաճումներ ապագային։
