Օգտուելով հիւրաբար Սիտնի գտնուելու պատեհ առիթէն, որպէս «Արարատ» թերթի տնօրէն-խմբագիր, մեր առաջին փափկավարական այցելութիւնը կատարեցինք Սիտնիի Չէթսվուտ շրջանին մէջ գտնուող Հայ Առաքելական Եկեղեցւոյ Առաջնորդարան, ուր ջերմ ընդունելութեան արժանացանք Աւստրալիոյ եւ Նոր Զելանտայի Հայոց թեմի Առաջնորդ՝ գերաշնորհ Տէր Վարդան եպս. Նաւասարդեանի կողմէ։
Մեզի կ’ընկերակցէին Աւստրալիոյ Ս.Դ.Հ.Կ. Վարիչ մարմինի ատենապետ ընկեր Սեպուհ Գալփաքեանը եւ փոխատենապետ ընկեր Ասատուր Հաճեանը։
Գերաշնորհ Սրբազան Հայրը սիրուած եւ յարգուած հոգեւոր առաջնորդ մըն է աւստրալահայ համայնքին մէջ, ինչ որ բազմաթիւ բարեկամներու եւ հաւատացեալներու վկայութեամբ եւս կը հաստատուի։ Յատկանշական է, որ ան 2005-2008 տարիներուն ծառայած է որպէս առաջնորդական փոխանորդ եւ առաջին իսկ օրէն շահած է իր հօտին սէրն ու վստահութիւնը։
Հանդիպման ընթացքին խօսեցանք թէ՛ աւստրալահայ համայնքը եւ թէ՛ լիբանանահայութիւնը յուզող զանազան հարցերու շուրջ։ Այս առիթով նաեւ փոխանցեցինք «Արարատ»-ի խմբագրութեան եւ ընտանիքին ողջոյններն ու բարեմաղթութիւնները Սրբազան Հօր եւ իր միջոցաւ՝ ամբողջ համայնքին։
Մեր զրոյցէն յստակ տպաւորութիւն կազմեցինք, որ երիտասարդ Սրբազան Հայրը մեծ նուիրումով, անխոնջ աշխատանքով եւ անկեղծ հոգածութեամբ կը ծառայէ իր համայնքին։ Ան յատուկ նախանձախնդրութեամբ կը ջանայ ամրապնդել գաղութին համախոհութիւնն ու միասնական ոգին՝ իր ամբողջ եռանդը ի սպաս դնելով ազգային ու հոգեւոր կեանքի հզօրացման։
Հանդիպման ներկայ էր նաեւ Սիտնիի Ս. Յարութիւն Եկեղեցւոյ հոգեւոր հովիւ Տէր Աւետիս քհնյ. Համբարձումեանը։
