3 Մայիս 2026-ին, Անգլիոյ «Նոր Սերունդ» մշակութային միութեան հրաւէրով Լոնտոնի մէջ տեղի ունեցաւ բացառիկ թատերական մենախօսութիւն մը՝ Ուիլիըմ Շէյքսփիրի «Ռիչըրտ III» կտորին հիման վրայ։
Գլխաւոր դերակատարն էր Հայաստանի վաստակաւոր արուեստագէտ Արամ Յովհաննիսեան, որ իր բարձր մակարդակի կատարողականութեամբ ներկայացուց այս բարդ եւ խորապէս հոգեբանական կերպարը, արժանանալով Լոնտոնի մշակութասէր հասարակութեան ջերմ ընդունելութեան եւ բարձր գնահատանքին։
Ներկայացումը արդէն իսկ ցուցադրուած է քանի մը երկիրներու մէջ՝ Ալպանիա, Մակեդոնիա, Լեհաստան, եւ արժանացած է միջազգային թատերական փառատօներու բարձրագոյն պարգեւներուն, ներառեալ «Կրան Փրի» (Grand Prix Excellent Performance) մրցանակը։
Ներկայացման աւարտին խօսք արտասանեց «Նոր Սերունդ» մշակութային միութեան ատենապետ դոկտոր Վազգէն Գասեմճեան, որ ընդգծեց նման նախաձեռնութիւններու կարեւորութիւնը՝ հայ մշակոյթի միջազգային ներկայացման եւ տարածման առումով։
Դոկտոր Գասեմճեան իր խօսքին մէջ ըսաւ․-
«Այսօր մենք ականատես եղանք ոչ միայն բարձր մակարդակի թատերական արուեստի, այլ նաեւ Շէյքսփիրի անմահ ստեղծագործութեան խորքային վերապրումի մը։ Արամ Յովհաննիսեանի կատարումը բացառիկ էր իր հոգեբանական ճշգրտութեամբ, արտայայտչական ուժով եւ բեմական ներկայութեամբ։ Ան յաջողեցաւ կենդանացնել Ռիչըրտ III-ի բարդ եւ հակասական կերպարը՝ դարձնելով զայն հասկանալի, կենդանի եւ ժամանակակից հանդիսատեսին մօտ։ Այս ներկայացումը մեր մշակութային առաքելութեան պայծառ օրինակն է, որ կամուրջ կը ստեղծէ հայ թատերարուեստին եւ միջազգային բեմերուն միջեւ։ Մենք հպարտ ենք, որ նման բարձր մակարդակի արուեստ կը ներկայացուի մեր կազմակերպութեան հովանիին տակ, արժանանալով միջազգային գնահատանքի եւ հանդիսատեսի անկեղծ ընդունելութեան»։
«Նոր Սերունդ» մշակութային միութեան կողմէ յատուկ շնորհակալութիւն կը յայտնենք Մեծ Բրիտանիոյ եւ Իրլանտայի թեմի առաջնորդ գերաշնորհ Տ. Յովակիմ եպիսկոպոս Մանուկեանին՝ առաջնորդարանի նորակառոյց սրահին մէջ այս գեղեցիկ ներկայացման համար ստեղծուած բարենպաստ պայմաններուն եւ աջակցութեան համար։
Միաժամանակ սիրով կը վերահաստատուի հրաւէրը՝ մասնակցելու Լոնտոնի մէջ կայանալիք տարեկան «Ամառնային փառատօն»-ին, որ պիտի տեղի ունենայ 2026 թուականի Յուլիս 19-ին։ Փառատօնի շրջագիծին մէջ նախատեսուած է նոր բեմադրութիւն մը՝ հինգ դերակատարներով ներկայացուող «Սայաթ-Նովա․ Աշխարհի հայ սիրերգակ» խորագրով նախագիծը, նուիրուած հայ մեծ բանաստեղծ եւ աշուղ Սայաթ-Նովայի ստեղծագործական ժառանգութեան։
