8 Մայիսին լրացաւ լիբանանահայ մտաւորական կեանքի երախտաւոր դէմքերէն Հրանդ Գանգրունիի (Գըրըշըքեան) մահուան 20-ամեակը։ Ան եղած էր «Արարատ» օրաթերթի խմբագիրներէն՝ 1949, 1950 եւ 1960 թուականներուն, իր գրիչով ու ազգային նուիրումով արժէքաւոր ծառայութիւն մատուցելով հայ մամուլին։
Ծնած 1925-ին, Գանգրունի Սահակեան վարժարանէն ետք ուսումը շարունակեց Կիլիկիոյ Կաթողիկոսարանի Դպրեվանքին մէջ, ուրկէ շրջանաւարտ ըլլալով՝ 1943-էն սկսաւ իր երկարամեայ ուսուցչական առաքելութիւնը։ Սէն Ժոզէֆ համալսարանի Հայագիտական ճիւղէն վկայուած, ան տարիներ շարունակ դասաւանդեց հայերէն, հայ գրականութիւն եւ հայոց պատմութիւն՝ սերունդներ կրթելով ազգային գիտակցութեամբ։
Ուսուցչութեան կողքին, նուիրուեցաւ լրագրութեան, հրապարակագրութեան եւ գրականութեան՝ իր «Վանիկ» ծածկանունով ստորագրած յօդուածներով դառնալով ծանօթ անուն մը լիբանանահայ մամուլին մէջ։ Իր արձակ էջերով եւ պատմագիտական աշխատութիւններով կարեւոր ներդրում ունեցաւ հայկական մտաւորական աշխարհին մէջ, իսկ 1975-1983 թուականներուն վարեց Ազգային Ռուբինեան վարժարանի տնօրէնութիւնը։
Այս առիթով, յարգանքով կը յիշենք մեր անցեալի վաստակաշատ խմբագիրներն ու մտաւորականները, որոնց նուիրումին եւ անխոնջ աշխատանքին շնորհիւ հայ մամուլը գոյատեւեց ու շարունակեց իր ազգային առաքելութիւնը։ Անոնց անմոռանալի յիշատակը միշտ վառ պիտի մնայ մեր յիշողութեան եւ գնահատանքին մէջ։
