22 Ապրիլ 2026-ին, Մեծի Տանն Կիլիկիոյ Կաթողիկոսարանի վեհարանին մէջ տեղի ունեցաւ հայ երեք հոգեւոր պետերուն ժողովը: Արամ Ա. կաթողիկոսին, Ռաֆայէլ Պետրոս ԻԱ. կաթողիկոս-պատրիարքին եւ վեր. Փօլ Հայտոսթեանին ընկերակցեցան խումբ մը ժողովականներ:
Վեհափառ հայրապետը խօսեցաւ այս ճգնաժամային պամաններուն մէջ համախմբուելու եւ խորհրդակցելու անհրաժեշտութեան մասին: Ժողովը ապա քննարկումով եւ խորհրդակցութեամբ արձանագրեց, թէ լիբանանահայութեան եւ համայն Սփիւռքին կոչ կ’ուղղուի համախմբուած ոգեկոչելու Ցեղասպանութեան 111-ամեակը:
Անդրադառնալով Լիբանանին ու տարածաշրջանին, նշուեցաւ որ հայկական համայնքներու հոգեւոր ու ազգային մարմինները մօտէն կը հետեւին տարածաշրջանի երկիրներուն մէջ ապրող հայութեան իրավիճակին ու դիմագրաւած մարտահրաւէրներուն: «Լիբանանի պարզած այս դժուար պայմաններուն մէջ լիբանանահայ համայնքը իր զօրակցութիւնը կը վերահաստատէ հանրապետութեան նախագահին եւ պետական կառոյցներուն կայացուցած որոշումներուն, ինչ կը վերաբերի երկրի տարածքային ամբողջականութեան պահպանման եւ գերիշխանութեան իրաւունքի գերադասման», նշուեցաւ կաթողիկոսութենէն հրապարակուած հաղորդագրութեան մէջ, միաժամանակ դատապարտելով իսրայէլեան շարունակուող յարձակումները, լիբանանեան հողերու բռնագրաւումը եւ ժողովուրդին տեղահանումը:
