Երէկ, 24 Ապրիլ 2026-ի առաւօտեան, Անթիլիասի մայրավանքի Սուրբ Գրիգոր Լուսաւորիչ տաճարին մէջ մատուցուեցաւ Ցեղասպանութեան սրբադասեալ նահատակներուն նուիրուած Ս. Պատարագ: Ապա, հանդիսապետութեամբ վեհափառ հայրապետին, Սրբոց Նահատակաց յուշարձան-մատուռին դիմաց տեղի ունեցաւ Բարեխօսական կարգ եւ ծաղկեպսակներու զետեղում, ներկայութեամբ ՀՄՄ-ի, ՀԲԸՄ-ՀԵԸ-ի եւ ՀՄԸՄ-ի սկաուտական խումբերը ներկայացնող սկաուտներու եւ երեք միութիւններուն փողերախումբերուն:
Հայ քաղաքական երեք կուսակցութիւններուն անունով կուսակցապետերը զետեղեցին միացեալ ծաղկեպսակ մը, որմէ ետք ծաղկեպսակներ խոնարհուեցան նաեւ ՀՄՄ-ի Կեդրոնական վարչութեան, ՆՍՄՄ-ին, ՀԿԲՄ-ին եւ լիբանանահայ բարեգործական, մարզական, մշակութային եւ կրթական կազմակերպութիւններու ներկայացուցիչներուն ձեռամբ, մինչ փողերախումբերը նուագեցին մահերգն ու Լիբանանի, Հայաստանի եւ Արցախի քայլերգները:
Արարողութեան աւարտին փողերախումբերուն կարարողութեամբ մատուցուեցաւ ազգային երաժշտութիւն:
Երէկ կանուխ առաւօտեան, ծաղկեպսակներու զետեղում տեղի ունեցաւ նաեւ Տանն Կիլիկիոյ Կաթողիկէ Հայոց Ժաաթաուիի Պատրիարքարանի շրջափակին մէջ զետեղուած՝ Ցեղասպանութեան զոհերուն նուիրուած յուշակոթողին մօտ, մասնակցութեամբ ՀՄՄ-ի փողերախումբին եւ սկաուտական խումբին, ինչպէս նաեւ հայկական սկաուտական միւս շարժումներուն եւ փողերախումբերուն:
