Շաբաթ, 11 Ապրիլ 2026-ի առաւօտեան, Մեծի Տանն Կիլիկիոյ Ն.Ս.Օ.Տ.Տ. Արամ Ա. Վեհափառ Հայրապետը, Անթիլիասի մայրավանքին մէջ, ընդունեց Սոցիալ Դեմոկրատ Հնչակեան Կուսակցութեան, Հայ Յեղափոխական Դաշնակցութեան եւ Ռամկավար Ազատական Կուսակցութեան ատենապետներ Վանիկ Տագէսեանը, Ալպեր Պալապանեանը եւ տոքթ. Աւետիս Տագէսեանը։ Խորհրդակցութիւնները կեդրոնացան մասնաւորաբար Հայոց ցեղասպանութեան 111-րդ տարելիցի ոգեկոչումի ծրագրերուն եւ ձեռնարկներուն վրայ։ Անթիլիասի մայրավանքին մէջ գումարուած ժողովին ընթացքին արծարծուեցան նաեւ Լիբանանի այժմու կացութեան առնչուած հարցեր: Այս առթիւ, Նորին Սրբութիւնը ողջունեց միջկուսակցական գործակցութիւնը՝ շեշտելով զայն աւելի խորացնելու եւ ամրապնդելու հրամայականը, համասփիւռքեան ու համահայկական տարողութեամբ։
