Լիբանանեան քաղաքական ուժերուն հետ հետեւողական խորհրդակցութիւններու ծիրին մէջ, Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինի անդամներ ընկ. Տիգրան Միհրանեան եւ ընկ. Միհրան Շահինեան կուսակցութեան Նոր Հաճնոյ կեդրոնատեղիին մէջ ընդունեցին Ընկերվար Յառաջդիմական Կուսակցութեան (ԸՅԿ) Պէյրութի շրջանի պատասխանատու Ուալիտ Աքըլի գլխաւորած պատուիրակութիւնը, ներկայութեամբ ՍԴՀԿ «Ժիրայր Մուրատ» եւ «Աղասի» մասնաճիւղերու ատենապետներուն եւ փոխատենապետներուն:
Ժողովականները քննարկեցին երկրին մէջ տիրող պատերազմական վիճակը եւ անոր քաղաքական, ապահովական ու ընկերատնտեսական հետեւանքները: Յատուկ անդրադարձ եղաւ ռազմական գործողութիւններու ականատես դարձող շրջաններէն տեղահանուած քաղաքացիներու հոսքին, Պէյրութի մէջ անոնց թիւին սրընթաց աճին եւ ժամանակաւոր կեցավայրերու անբաւարարութեան ու անպատրաստ վիճակին:
Անդրադառնալով ապահովական լարուած մթնոլորտին, ժողովականները անհրաժեշտ համարեցին իրավիճակի անյապաղ հանդարտեցումը՝ կանխելու համար ներքին որեւէ խնդիրի բռնկում: Ի տես լիբանանցիներուն դիմագրաւած իրարայաջորդ ճգնաժամերուն, ՍԴՀԿ-ի եւ ԸՅԿ-ի պատուիրակութիւնները քննարկեցին Պէյրութի բնակչութեան եւ ընդհանրապէս բոլոր լիբանանցիներուն առջեւ ցցուած ընկերային եւ տնտեսական մտահոգիչ ճգնաժամերը, շեշտելով որ այս անախորժ կացութեան վերջ դնելու համար անհրաժեշտ է կուսակցութիւններու եւ հասարակական կազմակերպութիւններու համատեղ աշխատանքը՝ պետական հաստատութիւններու հովանիին տակ, միշտ առաջնահերթ համարելով լիբանանցիներու շահերուն երաշխաւորումը:
