Magazine-lb հարթակի հետ զրոյցի մը ընթացքին, Լիբանանի Վարպետ ոսկերիչներու եւ գոհարագործներու սենտիքայի նախագահ Պօղոս Քիւրտեան յայտնեց իր կտրուկ ընդդիմութիւնը հանրային հատուածի պաշտօնեաներուն եւ զինուորական կազմին նախատեսուած աշխատավարձի բարձրացման նկատմամբ, նշելով որ նման քայլ մը ի վերջոյ բեռը կը դնէ քաղաքացիներու ուսերուն վրայ եւ զիրենք կը դնէ իրարու դէմ։
Քիւրտեան շեշտեց, որ պետութիւնը պարտաւոր է նախ պայքարիլ ապօրինութիւններու, մաքսանենգութեան եւ պետական կառոյցներու մէջ տիրող անգործունեայ ու անկարգ վիճակին դէմ, սկսեալ ծովեզերեայ հանրային կալուածներէն մինչեւ նաւահանգիստ եւ մաքսատուն։ Ան ընդգծեց, որ գոյութիւն ունին բազմաթիւ միջոցներ, որոնցմով պետութիւնը կրնայ ապահովել եկամուտներ՝ առանց կրկին անգամ ձեռքը երկարելու քաղաքացիներու գրպաններուն եւ անպատասխանատու հարկաբեռով ծանրացնելու զանոնք։
Ան նաեւ կոչ ուղղեց իրական եւ գործնական տնտեսական փրկութեան ծրագիրի մշակման, յիշեցնելով որ նախապէս առաջարկուած էր համազգային տնտեսական համաժողով մը, ուր մասնակցութիւն պիտի ունենային տնտեսական եւ ընկերային կառոյցներու ներկայացուցիչներ ու պետական պատասխանատուներ՝ յստակ բարեփոխումներու ճանապարհային քարտէս մը սահմանելու համար։
Վերջաւորութեան, Քիւրտեան յայտնեց, որ ոսկերիչներու եւ գոհարագործներու արտադրական հատուածը արդէն իսկ զգալիօրէն տուժած է նոր հարկային բեռերէն եւ բարձրացումներէն։
