Չորեքշաբթի, 11 Փետրուարի առաւօտեան, Նոր Մարաշի Հայ Աւետարանական եկեղեցւոյ սրահը լեցուած էր երախտագիտութեան եւ յարգանքի մթնոլորտով, ուր խուռներամ բազմութեան ներկայութեամբ, Ճինիշեան Հիմնարկը հանդիսաւոր կերպով մեկնարկեց իր հիմնադրութեան 60-ամեակի յոբելենական ձեռնարկներու շարքը՝ յատուկ օր մը նուիրելով իր հիմնադիրին՝ երախտաշատ Վարդան Ճինիշեանի յիշատակին։
«Յիշելով Վարդանը» խորագիրով կազմակերպուած այս յիշատակի հանդիսութիւնը վերածուեցաւ հոգեպարար եւ խորիմաստ ոգեկոչման՝ արժեւորելով այն տեսլականն ու ծառայութիւնը, որոնց վրայ հիմնուած է հիմնարկին վեց տասնամեակներու ազգօգուտ առաքելութիւնը։
Ձեռնարկին ներկայ էին հոգեւոր դասի ներկայացուցիչներ, կրթական, մշակութային եւ ընկերային հաստատութիւններու ղեկավարներ, Ճինիշեան Ծրագրի գործադիր տնօրէնը, Հայաստանի եւ Լիբանանի շրջանային տնօրէնները, հիմնարկի աշխատակազմը, յանձնախումբի անդամները, ինչպէս նաեւ համայնքային կեանքին մէջ ներգրաւուած բազմաթիւ հրաւիրեալներ, հաւատացեալ հայորդիներ։
Գեղարուեստական նրբաճաշակ յայտագրին մէջ, տիկին Անայիս Կետիկեանին եւ Արինէ Մարգարեանին հետ միասին, իրենց արժանաւոր մասնակցութիւնը բերին Համազգային Մշակութային Կեդրոնի եւ Մեսրոպեան գոլէճի ուսանողները, որոնց ներկայացուցած երգերը, ասմունքն ու ջութակի մեղեդիները յուզիչ ու առանձնայատուկ շուք հաղորդեցին յիշատակի օրուան հանդիսաւորութեան։
Գլխաւոր բանախօսութեամբ հանդէս եկաւ վերապատուելի Ռաֆֆի Մսըրլեան, որ շեշտեց հիմնադիրին հոգեւոր արժէքները եւ անոր տեսլականին շարունակական ազդեցութիւնը մեր համայնքային կեանքին մէջ։ Անոր յաջորդեցին Ճինիշեան Ծրագրի գործադիր տնօրէն Էլիզա Մինասեանի եւ Լիբանանի տնօրէն Քրիստին Դանիէլեանի պատգամները, որոնք վերահաստատեցին հիմնարկին յանձնառութիւնը՝ շարունակելու Վարդան Ճինիշեանի սկսած ուղին՝ իբրեւ ծառայութեան, համերաշխութեան եւ յոյսի կենդանի ժառանգութիւն, վկայելով որ Վարդան Ճինիշեանի տեսլականը կը շարունակէ առաջնորդել եւ ոգեշնչել իր ծառայութիւնը համայնքին եւ ազգին։
Հանդիսութիւնը իր աւարտին հասաւ Միջին Արեւելքի Հայ Աւետարանական Եկեղեցիներու Միութեան ատենապետ վերապատուելի Հրայր Չոլաքեանի աղօթքով, որ հոգեւոր օրհնութեամբ եզրափակեց այս յիշարժան օրը։
