Ներքաղաքական խորհրդակցութիւններու ծիրին մէջ, Մուսթաքպալ հոսանքի ընդհանուր քարտուղար Ահմատ Հարիրի, նախկին նախարար Ղաթթաս Խուրիի հետ երէկ այցելեց Սոցիալ Դեմոկրատ Հնչակեան Կուսակցութեան Նոր Հաճնոյ կեդրոնը, ուր տեսակցեցաւ ՍԴՀԿ Լիբանանի շրջանի Վարիչ մարմինին հետ, գլխաւորութեամբ ատենապետ ընկ. Վանիկ Տագէսեանի ու ներկայութեամբ պետական նախկին երեսփոխան Սերժ Թուրսարգիսեանի:
Ժողովականները քննարկեցին լիբանանեան ընդհանուր զարգացումները, կեդրոնանալով մանաւանդ Մայիսին տեղի ունենալիք խորհրդարանական ընտրութիւններու նախապատրաստութիւններուն վրայ: Անդրադառնալով նահատակ վարչապետ Ռաֆիք Հարիրիի ահաբեկման 21-րդ տարելիցին, զրուցակիցները այդ համարեցին լիբանանցիները համախմբելու հնարաւորութիւն, շեշտելով պետականաշինութեան ուղին, հաստատութիւնները ուժեղացնելու, ազգային միասնականութիւնն ու համագոյակցութիւնը պահպանելու վերաբերեալ նահատակ վարչապետին տեսլականին անժամանցելիութիւնը:
Ժողովը եզրափակուեցաւ կարեւորելով Հնչակեան կուսակցութեան եւ Մուսթաքպալ հոսանքին միջեւ քաղաքական եւ ընտրական համագործակցութեան շարունակութիւնը՝ յանուն լիբանանցիներուն համար աւելի լաւ ապագայի կերտումին:
