Գլխաւորութեամբ ատենապետ ընկ. Վանիկ Տագէսեանի, Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինը ներկայացնող պատուիրակութիւն մը, երէկ երեկոյեան, այցելեց Մեծն Տանն Կիլիկիոյ Արամ Ա. կաթողիկոսին, ընկերակցութեամբ Ս.Դ.Հ.Կ. Կեդրոնական վարչութեան անդամ ընկ. Ալեքսան Քէօշկէրեանի:
Տեսակցութեան ընթացքին առաւելաբար արծարծուեցան լիբանանեան հրատապ հարցերը: Վեհափառ Հայրապետը շեշտեց հայ քաղաքական երեք կուսակցութիւններուն միջեւ համագործակցութիւնը ամրապնդելու կարեւորութիւնը, ինչպէս նաեւ Լիբանանի երեսփոխանական ըտնրութիւններուն հայ համայնքի թեկնածուներուն ի նպաստ քուէարկելու հրամայականը: Հնչակեան պատուիրակութիւնը վերահաստատեց այս զգայուն փուլին միասնական աշխատանքին անհրաժեշտութիւնը՝ ի շահ լիբանանահայ համայնքին: Քննարկուեցան նաեւ Հայաստանին ու Հայաստան-Սփիւռք յարաբերութիւններուն վերաբերող նիւթեր:
