Ամանորեան արձակուրդները իր ծննդավայրին մէջ անցընելու եւ հարազատներուն հետ հանդիպելու նպատակով, ԱՄՆ-էն Լիբանան ժամանած էր մեր թերթի յօդուածագիր, մտաւորական եւ գրագիտուհի տիկին Սիլվա Իսկիկեան-Մահսերեճեանը։ Իր մդկնումէն քանի մը օր առաջ, «Արարատ»-ի խմբագրատունը բախտաւորուեցաւ անոր քաջալերական ներկայութեամբ, որ խորհրդանշական իմաստով առաջին այցելութիւնը հանդիսացաւ նոր տարուան՝ 2026 թուականին։
Թէեւ տիկին Մահսերեճեանի գրութիւնները պարբերաբար կը զարդարեն «Արարատ»-ի էջերը, սակայն անոր անձնական այցելութիւնը խորապէս գնահատելի եւ ոգեւորիչ էր թերթի տնօրէնութեան ու աշխատակազմին համար, մանաւանդ որ ան կ’ապրի Ամերիկայի Միացեալ Նահանգներու Լոս Անճելըս քաղաքին մէջ եւ, այսուհանդերձ, իր կեցութեան սուղ ժամանակէն բաժին մը յատկացուց «Արարատ»-ին։
Տիկին Սիլվա Իսկիկեան-Մահսերեճեանը ընթերցողին ծանօթ է իր կեանքէն բխած, սրտառուչ եւ հարազատ գրութիւններով։ Անոր պատմուածքներուն մէջ մշտապէս ներկայ են մարդասիրութեան, ծառայասիրութեան եւ յատկապէս տկարին ու ալեւորին նեցուկ կանգնելու գաղափարները։ Այդ գրական ուղղութիւնը իր գրութիւնները դարձուցած է հայ ընթերցողին կողմէ փնտռուած ու սպասուած։
Անոր գրական դիմագիծին կարեւոր երեսակներէն մէկն ալ երիտասարդ կամ սկսնակ գրիչներուն հանդէպ ցուցաբերած ուշադրութիւնն ու քաջալերանքն է։ Համացանցի վրայ, ան խտրութիւն չդնելով փորձառու կամ նորահաս հեղինակներու միջեւ, անուշ ու քաջալերական անդրադարձներով կը սատարէ գրիչի ճանապարհը բռնածներուն։ Տիկին Սիլվան նաեւ մոլի ընթերցող է եւ գրական բազմակողմանի հետաքրքրութիւններու տէր, ինչ որ արտայայտուած է նաեւ բանաստեղծական քերթուածներով։
Հանրութեան մէջ ան ծանօթ է նաեւ որպէս հանգուցեալ բժիշկ Կարօ Մահսերեճեանի կինը: Կողակիցը բժիշկի մը, որ իր ժամանակին մեծ ներդրում ունեցած է շրջանի առողջապահական կեանքին մէջ՝ նուիրումով ծառայելով թէ՛ հաստատութիւններու եւ թէ՛ անհատներու։
Այցելութեան մասնակցեցաւ նաեւ Ս.Դ.Հ.Կ.-ի մամլոյ դիւանապետ ընկեր Գէորգ Տաղլեանը։
Քանի որ այս շաբթուան ընթացքին Հայ Եկեղեցին կը նշէ Սուրբ Յովհաննու Կարապետի օրը, այդ առիթով տիկին Սիլվա Իսկիկեան-Մահսերեճեան, իր ամուսնոյն՝ պէյրութահայ յարգուած բժիշկ Կարօ Մահսերեճեանի յիշատակին, սրտաբուխ նուիրատուութիւն մը կատարեց «Արարատ»-ին՝ միաժամանակ քաջալերելով թերթի աշխատակազմին նուիրեալ աշխատանքը, որուն համար խորապէս շնորհակալ ենք:
Միաժամանակ, յոյս եւ վստահութիւն կը յայտնենք, որ ոչ-հեռու ապագային պիտի ունենանք ուրախութիւնը՝ մեր սեղանին վրայ տեսնելու տիկին Մահսերեճեանի բարձրորակ եւ արժէքաւոր գրութիւնները ամփոփող ինքնուրոյն հատոր մը, որպէս ներդրում հայ գրական կեանքին եւ մնայուն ժառանգութիւն ընթերցողին։
