Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինի ատենապետ ընկ. Վանիկ Տագէսեան, նախկին երեսփոխան Սերժ Թուրսարգիսեանի ընկերակցութեամբ այցելեց Լիբանանի մէջ Սէուտական Արաբիոյ դեսպան դոկտ. Ուալիտ էլ-Պուխարիի Եարզէի բնակարանը, ուր դիւանագէտին հետ քննարկեց զանազան նիւթեր՝ ներառեալ Լիբանանի ներքին եւ արտաքին քաղաքական զարգացումները, Միջին Արեւելքի վիճակն ու լիբանանցիներուն առջեւ ցցուած մարտահրաւէրները: Ժողովականները քննարկեցին լիբանանեան-սէուտական յարաբերութիւնները աւելի զարգացնելու միջոցները՝ յանուն եղբայրական երկու ժողովուրդներուն: Դրական մթնոլորտի մէջ ընթացած տեսակցութեան ընթացքին ընկ. Տագէսեան եւ սէուտցի դեսպանը շեշտեցին խորհրդակցութիւնները շարունակելու եւ Լիբանանին ու լիբանանցիներուն շահերէն բխող համագործակցութիւնը ամրապնդելու կարեւորութիւնը:
