Միացեալ Նահանգներու արեւմտեան ափէն կը հաղորդուի վախճանումը (Դեկտեմբեր 4) Հայց. Եկեղեցւոյ վաստակաւոր սպասաւորներէն ու մտաւորական դէմքերէն մէկուն` դոկտ. Տ. Զաւէն աւ. քհնյ. Արզումանեանի, որ այս աշխարհէն հրաժեշտ կ`առնէ պատկառելի տարիքի մը մէջ, լի` արդիւնաւէտ սպասարկութեամբ եւ մատենագրական ուշագրաւ վաստակով։
Տ. Զաւէն իր քահանայի համեստ անունը պատմութեան մէջ ամրագրեց` շարունակելով Օրմանեան սրբազանի նշանաւոր «Ազգապատում» եռահատոր պատմագիրքը, Հայց. Եկեղեցւոյ կարեւոր դէպքերն ու իրադարձութիւնները պատմելով ու շարայարելով խղճմտօրէն, սկսելով 1910-ական թուականներէն ու հասնելով մինչեւ Վազգէն Ա. Հայրապետի վախճանման օրերը, 1994։ Այսպիսով, 3 նոր հատորներով, ան շարունակած եղաւ Օրմանեանի կոթողային աշխատասիրութիւնը, որդեգրելով անոր միեւնոյն սկզբունքներն ու պատմելու եղանակը։
Տ. Զաւէն (որ նախապէս կուսակրօն հոգեւորական էր, սակայն յետոյ` ընդունած էր ամուսնացեալ քահանայի կարգավիճակ), առաւելաբար ծառայեց Ամերիկայի հայկական ծուխերուն։ Աշխուժօրէն կ`աշխատակցէր նաեւ Հայ մամուլին։
Յառաջիկային դեռ առիթ կ`ունենանք անդրադառնալու իր մասին։
