Քաղաքական զանազան ուժերու հետ խորհրդակցութեանց ծիրին մէջ, Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինի ատենապետ ընկ. Վանիկ Տագէսեան Հինգշաբթի, 27 Նոյեմբերի երեկոյեան, ՍԴՀԿ-ի Նոր Հաճնոյ կեդրոնին մէջ ընդունեց Փաղանգաւոր կուսակցութեան պատուիրակութիւնը՝ գլխաւորութեամբ կուսակցապետի քաղաքական եւ ընտրական հարցերու օգնական Սերժ Տաղէրի: Ներկայ էին Վարիչ մարմինի անդամներ ընկ. Տիգրան Միհրանեան, ընկ. տոքթ. Սագօ Պետիկեան եւ ընկ. Լութֆիկ Կոտալազեան:
Ժողովականները քննարկեցին Լիբանանի քաղաքական, տնտեսական եւ ազգային ընթացիկ իրավիճակները, տարածաշրջանային զարգացումները, ինչպէս նաեւ 2026-ի ընտրական հոլովոյթը։
Ժողովը տեղի ունեցաւ կառուցողական եւ փոխադարձ յարգանքի մթնոլորտի մէջ։ Զոյգ պատուիրակութիւնները վերահաստատեցին իրենց պատրաստակամութիւնը՝ շարունակելու քաղաքական երկխօսութիւնը, ամրապնդելու փոխադարձ կապերն ու համագործակցութիւնը՝ Լիբանանի ազգային ընդհանուր շահերուն ծառայելու նպատակով։
