Հայ երեք յարանուանութեանց հոգեւոր ղեկավարներու այցելութեանց ծիրին մէջ, Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինի ատենապետ ընկ. Վանիկ Տագէսեան եւ մարզական դիւանապետ ընկ. Լութֆիկ Կէօտալազեան երէկ երեկոյեան այցելեցին Մերձաւոր Արեւելքի Հայ Աւետարանական Եկեղեցիներու Միութեան նախագահի տեղապահ, վերապատուելի դոկտ. Փօլ Հայտոսթեանին, ընկերակցութեամբ Պէյրութի եւ Սին էլ Ֆիլի քաղաքապետական խորհուրդներուն մէջ Հնչակեան կուսակցութեան ներկայացուցիչներ Յովհաննէս Պչաքճեանի եւ Գարոլին Խաչիկեանի:
Հանդիպումը հնարաւորութիւն ընծայեց Հայկազեան համալսարանի նախագահին ծանօթացնել քաղաքապետական երիտասարդ երկու դէմքերը եւ ներկայացնել Պէյրութի ու Սին էլ Ֆիլի շրջանները բարեկարգելու մասին անոնց գաղափարներն ու առաջարկները:
Մտերմիկ մթնոլորտի մէջ ընթացած տեսակցութեան ընթացքին ժողովականները միտքեր փոխանակեցին Լիբանանին ու լիբանանահայութեան առջեւ ցցուած հրատապ թղթածրարներուն եւ խնդիրները դիմագրաւելու միջոցներուն մասին: Անդրադարձ եղաւ գաղութին մէջ Հայ աւետարանական եկեղեցւոյ կենսական գործունէութեան, ինչպէս նաեւ Հայկազեան համալսարանի կրթական առաքելութեան: Խաչիկեան եւ Պչաքճեան բացայայտեցին իրենց քաղաքապետական առաջնահերթութիւնները, իսկ Հնչակեան կուսակցութեան պատուիրակութիւնը դոկտ. Հայտոսթեանին ներկայացուց իր նորագոյն նախաձեռնութիւննները, շեշտելով լիբանանահայութեան վիճակը բարելաւելու ուղղութեամբ միացեալ ծրագրեր իրագործելու եւ այդ առումով համագործակցելու հրամայականը:
