Համայնքը կը զօրանայ այն ատեն, երբ իւրաքանչիւր անդամ կը կատարէ իր բաժին պարտականութիւնը եւ կը մնայ եկեղեցւոյ կենդանի օղակը։ Ծնողներն ու երիտասարդները պէտք է աւելի գործուն դեր ստանձնեն եկեղեցւոյ կեանքին մէջ։
Առ այդ, անցեալ Շաբաթ օր, երեկոյեան ժամը 8։00֊ին, Նոր Հաճըն թաղի Հ.Կ.Բ.Մ.֊ի դարմանատան սրահին մէջ տեղի ունեցաւ Հաճնոյ Հայրենակցական Միութեան կազմակերպած Հաճնոյ հերոսամարտի 105-ամեակի օրուան մատաղի պատրաստութեան օգնականներու նուիրուած շնորհակալական հաւաքը։ Ուրախ եւ ջերմ մթնոլորտի մէջ, համախմբուած էին Նոր Հաճընի Ս․ Գէորգ եկեղեցւոյ քահանայ հայրը, Թաղական խորհուրդի անդամները, Տիկնանց յանձնախումի անդամները, «Գայիանէ» երգչախումբի ղեկավարն ու անդամները, նաեւ Հաճնոյ Հայրենակցական Միութեան վարչութեան ատենապետ պրն. Փօլ Եագուպեանը եւ անդամներ, ինչպէս նաեւ 105-ամեակի մատաղի պատրաստութեան մասնակիցները։
Հաճնոյ Հայրենակցական Միութեան վարչութեան անունով խօսք արտասանեց «Արարատ» օրաթերթի տնօրէն եւ խմբագիր պրն. Նազօ Ճէրէճեան, շնորհակալութիւն ու գնահատանքի խօսք յայտնելով բոլոր օգնող ձեռքերուն։ Հաճնոյ Ս․ Գէորգ եկեղեցւոյ թաղականութեան ատենապետ պրն. Աւագ Պարախեան նոյնպէս խօսք առաւ եւ քաջալերեց աշխատողներուն ջանքը։
Ճաշի սեղանի շուրջ եղան կենացներ, մաղթանքներ, գեղեցիկ խօսքեր ու երգեր։ Քանի մը ժամ ներկաները վայելեցին ուրախ մթնոլորտ եւ բարձր տրամադրութեամբ վերադարձան իրենց տուները։
