Հինգշաբթի, 13 Նոյեմբեր 2025-ին, «Ազդակ»-ի «Փիւնիկ» սրահին մէջ տեղի ունեցաւ համահայրենակցական միութիւններու ներկայացուցիչներու խորհրդակցական հանդիպում մը, որուն մասնակցեցան միութիւններու վարչութիւններուն ատենապետները:
Նախաձեռնութիւնը կը միտէր վերաշխուժացնել հայրենակցական միութիւններու դերը եւ անոնց հայապահպանման աշխատանքին սատար հանդիսանալ:
Հանդիպումին ներկայ էին Այնթապի, Ամանոսի, Տէօրթեօլ-Չորք Մարզպանի, Հաճնոյ, Պաղջէի, Լափաճի, Սասնոյ, Մուսա լերան, Մարաշի, Պէրէճիկի, Համախարբերդի, Ռումտիկին-Քելլելի եւ Եոզկաթի հայրենակցական միութիւններու ներկայացուցիչները:
Հանդիպումին բացման խօսքը արտասանեց եւ ներկաներուն բարի գալուստ մաղթեց Հայրենակցական միութիւններու յանձնախումբի անդամ Սեւան Կարապետեան-Ադամեան, որ իր խօսքին մէջ ընդգծեց հայրենակցական միութիւններու կարեւորութիւնը` հաւաքական յիշողութեան պահպանման, մշակութային, դաստիարակչական եւ պահանջատիրական մարզերուն մէջ:
Այնուհետեւ խօսք առաւ Արծիւ Տէր Խաչատուրեան, որ շեշտեց նման նախանձախնդրութեան կարեւորութիւնը` հայրենակցական միութիւններու աշխատանքին վերաբերեալ եւ քաջալերեց հայրենակցական միութիւններու ներկայացուցիչները, որպէսզի աւելի մօտէն հետեւին աշխատանքներուն:
Այնուհետեւ հայրենակցական միութիւններէն իւրաքանչիւրին ներկայացուցիչը զեկուցեց իր միութեան այսօրուան պարզած վիճակին ու պայմաններուն մասին` թէ՛ վարչական, թէ՛ նիւթական, եւ թէ՛ կազմակերպչական դժուարութիւններուն վերաբերող ընդարձակ զեկուցում ներկայացնելով:
Որոշուեցաւ, որ յառաջիկային իւրաքանչիւր հայրենակցական միութիւն վերադասաւորումներ կատարէ` վերաշխուժացնելու համար հայրենակցական միութիւններու կեանքը:
