«Արարատ»-ի տնօրէնութեան, խմբագրակազմին եւ ողջ պաշտօնէութեան անունով կը յայտնենք մեր ջերմագին շնորհաւորանքները «Մասիս» շաբաթաթերթին՝ հիմնադրութեան 45-րդ տարեդարձին առիթով։
Չորս տասնամեակէ աւելի «Մասիս»-ը իր անշեղ աշխատասիրութեամբ, գաղափարական հաւատարմութեամբ, որպէս ինքնատիպ ձայն կը շարունակէ իր մամլոյ ծառայողական առաքելութիւնը Ամերիկայի մէջ։ Այս երկար ուղին կերտուեցաւ ընթերցողներու ակնկալութիւնները արժեւորելով, կամաւորներու նուիրումով եւ խմբագրական հետեւողական աշխատանքով՝ համադրելով սփիւռքահայ իրականութեան խնդիրները, հայրենի լուրերը եւ աշխարհասփիւռ հայութեան մտահոգութիւնները։
Կլենտէյլի մէջ տեղի ունեցած 45-ամեակի հանդիսութիւնը վկայութիւնը եղաւ ոչ միայն «Մասիս»-ի անցնող պայծառ ուղիին, այլ նաեւ այն գնահատանքին, որ կը վայելէ ան ԱՄՆ-ի, Հայաստանի եւ սփիւռքեան կառոյցներու մօտ։ Տօնակատարութեան մասնակից էին հայ եւ ամերիկացի ներկայացուցիչներ, եկեղեցականներ, կուսակցական մարմիններ, ինչպէս նաեւ ԱՄՆ գոնկրեսի անդամ Լորա Ֆրիտմընը, որուն կողմէ խմբագիր Գրիգոր Խոտանեանին շնորհուեցաւ «Գոնկրեսական Գնահատանքի Վկայագիր»։ Նշանակալի էր նաեւ Հայաստանի գլխաւոր հիւպատոս Կարէն Իսրայէլեանի ուղերձը, ինչպէս նաեւ ԱՄՆ-ի Արեւմտեան թեմի բարեջան առաջնորդ՝ գերշ. Տ. Յովնան արք. Տէրտէրեանի տեսերիզային պատգամը։ Օրուան գլխաւոր բանախօսն էր Փասատինայի Յովսէփեան վարժարանի ժրաջան տնօրէն՝ թատերագիր Շահէ Մանկրեան։
«Արարատ»-ը՝ իբրեւ համանման գաղափարական ուղի ունեցող երկօրեայ թերթ, կը գնահատէ իր ամերիկաբնակ գրչեղբօր՝ «Մասիս»-ի լրագրողական ընթացքը, ազգային-միութենական ծառայութիւնը եւ հայապահպանութեան մէջ ունեցած այն դերը, որ կը գերազանցէ սովորական մամուլի առաքելութիւնը։
«Մասիս»-ի խմբագիր ընկեր Գրիգոր Խոտանեանին եւ գաղափարակից ընկերներուն կը մաղթենք նորանոր յաջողութիւններ, ընթերցողական աւելի լայն շրջանակ ու եւս տասնամեակներու լուսաւոր ուղի։
Շնորհաւոր 45-ամեակդ, «Մասիս»։
