Շաբաթ, 8 Նոյեմբերի առաւօտեան, Զմմառու մայրավանքի «Փոխման Ս. Կուսի» մայր եկեղեցւոյ մէջ, Հայրապետական Սուրբ եւ Անմահ պատարագը մատոյց եւ յաւուր պատշաճի քարոզեց Ն.Ա.Գ.Տ.Տ. Տանն Կիլիկիոյ Կաթողիկէ Հայոց Ռաֆայէլ Պետրոս ԻԱ. կաթողիկոս-պատրիարքը, առընթերակայութեամբ գեր.Կարապետ վրդ. Գլընճեանի եւ գեր. Վարդան վրդ. Ճալլուֆեանի։
Պատարագի ընթացքին երեք ժառանգաւորներ` Պօղոս Էմիշեան, Յակոբ Ժամկոչեան եւ Աբրահամ Իսահակեան ստացան դպրութեան կարգը, իսկ Պօղոս Էմիշեան Կիսասարկաւագութեան տուչութիւնը եւս։
Հոգեւոր Տէրը իր քարոզին մէջ շեշտը դրաւ եղբայրսիրութեան եւ այդ ոգիով հաղորդութեան մօտենալու անհրաժեշտութեան վրայ։
Հոգեպարար արարողութենէն ետք, ընծայարանի սեղանատան մէջ տեղի ունեցաւ եղբայրական ագապ։
Ժառանգաւորները ներկայացուցին գեղարուեստական կոկիկ յայտագիր մը։
Ընծայարանի քայլերգ «Օն Դու ակումբ»ը եւ Ս. Իգնատիոս Մալոյեանի նուիրուած «Բազմաչարչար» շարականը հնչեցուցին սաները, ղեկավարութեամ բարեշնորհ Նշան սրկ. Հաննէշեանի։
Բացման խօսքով հանդէս եկաւ Յակոբ Ժամկոչեան։
«Տիրոջ կամքով» ստեղծագործութիւնը` Աբրահամ Իսահակեանի կատարողութեամբ ունկնդրուեցաւ։
Ապա ընծայարանի վերակացու Հ. Կարապետ վրդ. Գլընճեան իր սրտին խօսքը արտասանեց՝ ըսելով. «Սիրելի նորընծաներ եւ ժառանգաւորներ, դուք
պէտք չէ բաւարարուիք եւ հպարտանաք ձեր արձանագրած յառաջընթացով, այլ ընդհակառակը` այս բոլորը նոր սկիզբ եւ նոր մեկնակէտ պէտք է ըլլայ ձեր ապագայ ծրագրերու իրագործման։ Ս. Իգնատիոս Մալոյեան լաւագոյն օրինակը պէտք է հանդիսանայ ձեզի, որովհետեւ ան մեծ նուիրումով, Քրիստոսասիրութեամբ, ազգասիրութեամբ, նոյնիսկ անձնազոհութեամբ դարձաւ Միաբանութեան դափնին։
Ան իր ամբողջ էութեամբ նուիրուեցաւ Զմմառեան սկզբունքներուն եւ գաղափարականին, որուն պտուղները այսօր իսկ կը քաղենք»։
Հայր Սուրբը խօսքի աւարտին ըսաւ. «Որպէս Զմմառու Պատրիարքական Կղերի միաբաններ, համայն աշխարհի աչքերուն առաջ` 19 Հոկտեմբերին, մենք զմեզ խոյացած զգացինք»։
Ապա օրուան պատգամը փոխանցեց Զմմառու Պատրիարքական Կղերի միաբանութեան Պատրիարքական փոխանորդ եւ Զմմառու Վանքի Մեծաւոր գերպծռ. Մաշտոց թ.ծ.վ. Զահթէրեան, ըսելով. «Այսօր Դպրեվանքի տօնը առիթ մըն է, որ մեր բերկրանքն ու հրճուանքը արտայայտենք եւ ըսենք` Զմմառու Պատրիարքական Կղերի միաբանները պատմութեան ընթացքին բազում-բազմապիսի սխրանքներ գործած են, որոնք պսակուեցան Մալոյեանի սրբադասմամբ։ Թող Սուրբին պանծալի օրինակը ձեր գաղափարականը դառնայ եւ անոր ուղիով հունաւորէք ձեր ապագայ առաքելութիւնը»։
Մեծաւոր հայրը խօսքը եզրափակեց՝ ըսելով. «Այժմ թոյլ տուէք շնորհաւորեմ Ամեն. եւ Գերերջ. Հոգեւոր Տիրոջ անուանակոչութիւնը, թող անսասան մնայ Տանն Կիլիկիոյ Կաթողիկէ Հայոց Հայրապետական գահը։ Կը շնորհաւորեմ Դպրեվանքի տօնը, որ տարին անգամ մը մեզ կը համախմբէ իր յարկին տակ` յիշեցնելով մեզի մեր ուսումնական տարիները եւ այժմու նորընծաներն ու ժառանգաւորները խրախուսելով հաստատ մնալու իրենց կոչման մէջ։ Կը շնորհաւորեմ բոլոր անոնք, որոնք կը կրեն Միքայէլ, Գաբրիէլ, Ռաֆայէլ, Քերովբէ եւ Սերովբէ հրեշտակներուն անունները։ Թող ամէն տարի նմանօրինակ բարի եւ հաճելի անակնկալներով լի անուանակոչութիւններ նշենք` ի փառս Հայ եկեղեցւոյ եւ ի պանծացումն Զմմառու վանքին»։
Այնուհետեւ, Սօսէ Փիլաւճեանի խմբագրած «Կանչ Հրեշտակապետին» տարեգիրքի 45-ամեակի բացառիկ թիւի գինեձօնը եւ օրուան կարկանդակի հատումը տեղի ունեցաւ, ձեռամբ ամեն. եւ գերերջ. Հոգեւոր Տիրոջ, Մեծաւոր հօր եւ վանքի վարչական հայրերուն։
Հոգեւոր Տիրոջ հայրապետական յորդորներով, թելադրութիւններով եւ աղօթքով լրումին հասաւ տօնակատարութիւնը։
