7 Նոյեմբերի երեկոյեան, խմբագրատան մէջ նշուեցաւ հայ մամուլի անխափան ջահակիր «Արարատ»ի 88-րդ տարեդարձը: Սրահը լեցուն էր ջերմութեամբ ու սփիւռքեան մամուլի հանդէպ հաւատարմութեան շունչով։ Բազմաշատ էին ներկաները՝ Սոցիալ Դեմոկրատ Հնչակեան Կուսակցութեան Կեդրոնական վարչութեան անդամով, Լիբանանի շրջանի Վարիչ մարմինը իր ատենապետով եւ գրեթէ ամբողջ կազմով, ինչպէս նաեւ կուսակցութեան մասնաճիւղերու ներկայացուցիչներով։ Ներկայ էին նաեւ Տ.Ու.Ե.Մ., Հ.Մ.Մ., Ն.Ս.Մ.Մ. եւ Հ.Կ.Բ.Մ. միութիւններու պատուիրակներ, յօդուածագիրներ, աշխատակիցներ, որոնք միասնաբար հաւաքուած էին նշելու հնչակեան մամուլի պաշտօնաթերթ «Արարատ»-ի 88-ամեայ յոբելեանը։
Ջերմ բարի գալուստով երեկոյի բացումը կատարեց մամլոյ դիւանապետ ընկեր Գէորգ Տաղլեանը։ Այնուհետեւ, «Արարատ»ի տնօրէն ընկեր Նազօ Ճէրէճեան արտասանեց իր սրտաբուխ խօսքը՝ գծագրելով թերթի ութսունութ տարիներու ճանապարհը։ Ան յիշեց հիմնադրութենէն մինչեւ մեր օրերը անընդհատ պայքարի ու նուիրումի տարիները՝ շեշտելով որ «Արարատ»-ը գոյատեւած է միշտ այն «խենթերուն» շնորհիւ, որոնք ծառայած են մամուլին իբրեւ կամաւորներ՝ սիրայօժար եւ հաւատքով։
Ընկեր Ճէրէճեան «Արարատ»-ը նմանցուց այն մակոյկին, որ կը թիաւարէ ալեկոծ ովկիանոսի մէջ՝ համեստ միջոցներով, բայց անսասան կամքով։ Իր խօսքին ընթացքին ան շնորհակալութիւն յայտնեց բոլոր հիմնադիր խմբագիրներուն, հին ու նոր աշխատակիցներուն, Ս.Դ.Հ.Կ.-ի Վարիչ մարմինին, մամլոյ դիւանապետին, պաշտօնէութեան, ցրուիչներուն, յօդուածագիրներուն եւ յատկապէս հաւատարիմ ընթերցողներուն, որոնք կը շարունակեն կենդանի պահել թերթին բուն ոգին։
Ուրախ մթնոլորտի մէջ, ընկեր Ճէրէճեանի հետ միասին, Ս.Դ.Հ.Կ. Կեդրոնական վարջութեան անդամ ընկեր Ալեք Քէօշկէրեան եւ Լիբանանի շրջանի Վարիչ մարմինի ատենապետ ընկեր Վանիկ Տագէսեան, կատարեցին տարեդարձի կարկանդակի հատման արարողութիւնը՝ խորհրդանշելով վերազարթօնքն ու շարունակական ծառայութեան խոստումը։
Աւարտին, հիւրասիրութեան եւ սուրճի շուրջ շարունակուեցան մտերմիկ զրոյցներ, յուշեր եւ հին օրերու պատմութիւններ։ Բոլորը կը կիսէին նոյն զգացումը՝ հպարտութիւն եւ պարտաւորութիւն՝ շարունակելու այն լոյսը, որ ութսունութ տարի առաջ վառեցաւ «Արարատ»-ի էջերուն մէջ եւ մինչեւ այսօր կը լուսաւորէ ընդհանրապէս սփիւռքահայ եւ յատկապէս լիբանանահայ կեանքը։
