Սոցիալ Դեմոկրատ Հնչակեան Կուսակցութեան Կեդրոնական վարչութեան ատենապետ ընկ. Տոքթ. Համբիկ Սարաֆեանի գլխաւորած պատուիրակութիւնը, ընկերակցութեամբ Արեւմտեան Ամերիկայի շրջանի Վարիչ մարմինի ատենապետ ընկ. Միհրան Խաչատուրեանին, Լոս Անճելըսի Ազգային առաջնորդարանին մէջ տեսակցեցաւ Մեծի Տանն Կիլիկիոյ ՆՍ.Օ.Տ.Տ Արամ Ա. կաթողիկոսին հետ, որ հովուապետական այցելութեամբ կը գտնուի Գանատա եւ Միացեալ Նահանգներ:
Ժողովականները արծարծեցին Հայաստանը յուզող հարցերը, Հայրենիքի եւ Սփիւռքի միջեւ յարաբերութիւնները, ինչպէս նաեւ սփիւռքահայ համայնքներու վերակազմակերպումին եւ վերակենսաւորումին ուղղութեամբ տարուած աշխատանքը, ընդգծելով մանաւանդ միջկուսակցական համագործակցութիւնը:
Վեհափառ Հայրապետը ողջունեց Հնչակեան կուսակցութեան պատուիրակութեան այցելութիւնը, դիտել տալով, որ նորօրեայ մարտահրաւէրներուն դիմաց հրամայական է ազգային միասնականութիւնը, որ պահպանելու համար անհրաժեշտ է միջհամայնքային եւ միջկուսակցական համագործակցութիւն:
