Սոցիալ Դեմոկրատ Հնչակեան Կուսակցութեան «Կուժունի» մասնաճիւղի ընկերները ՀՄՄ Անթիլիասի ակումբին մէջ հիւրընկալեցին Պէյրութի եւ Սին էլ Ֆիլի քաղաքապետական խորհուրդներուն մէջ կուսակցութեան ներկայացուցիչներ Յովհաննէս Պչաքճեանն ու Գարոլին Խաչիկեանը, ներկայութեամբ ՍԴՀԿ Լիբանանի շրջանի Վարիչ մարմինի ատենապետ ընկ. Վանիկ Տագէսեանի:
Մտերմիկ մթնոլորտի մէջ գումարուած այս փոխադարձ ծանօթացումի հանդիպումին ընթացքին ՍԴՀԿ «Կուժունի» մասնաճիւղին ընկերները մանրամասնութիւններ ներկայացուցին շրջանին մէջ իրենց տարած աշխատանքներուն եւ յառաջիկայ ամիսներուն նախատեսուած ծրագրերուն մասին: Երկուստեք շեշտուեցաւ բոլոր շրջաններուն մէջ ժողովուրդին հնարաւորինս օգնութեան ձեռք մեկնելու եւ առկայ մտահոգութիւնները փարատելու կարեւորութիւնը:
