Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինը ներկայացնող պատուիրակութիւն մը, գլխաւորութեամբ ատենապետ ընկ. Վանիկ Տագէսեանի, երէկ Ազգային առաջնորդարանին մէջ այցելեց Լիբանանի հայոց թեմի բարեջան առաջնորդ գերշ. Տ. Շահէ արք. Փանոսեանին, ընկերակցութեամբ Պէյրութի եւ Սին էլ Ֆիլի քաղաքապետական խորհուրդներուն մէջ Հնչակեան կուսակցութեան ներկայացուցիչներ Յովհաննէս Պչաքճեանին եւ Գարոլին Խաչիկեանին: Ջերմ մթնոլորտի մէջ ընթացած տեսակցութեան ընթացքին, Առաջնորդ Սրբազանը աւելի մօտէն ծանօթացաւ քաղաքապետական խորհուրդներու զոյգ անդամներուն, անոնց գաղափարներուն, գործունէութեանց եւ ծրագրերուն, որոնք կը միտին աւելի բարեկարգ միջավայր ստեղծելու Պէյրութի եւ Սին էլ Ֆիլի մէջ՝ ներառեալ հայաշատ թաղամասերը: Հնչակեան պատուիրակութիւնն ու Առաջնորդ Սրբազանը արծարծեցին ընդհանրապէս լիբանանցիներուն եւ մասնաւորաբար լիբանանահայութեան վերաբերող խնդիրները, առկայ մարտահրաւէրները, լուծումի հնարաւորութիւնները եւ կենցաղային աւելի լաւ պայմաններու հրամայականը: Միտքեր փոխանակուեցան նաեւ հայկական ազգային նիւթերուն շուրջ: Հնչակեան պատուիրակութիւնը պատրաստակամութիւն յայտնեց ընդմիշտ համագործակցելու յանուն մեր ժողովուրդի բարեկեցութեան:
Հնչակեան Պատուիրակութիւնը Կ’այցելէ Առաջնորդ Սրբազանին
