Սեպտեմբեր 28-ին, Հայ Առաքելական Սուրբ Եկեղեցին նշեց Սուրբ Գէորգ Զօրավարի տօնը։ Քաջարի նահատակ սուրբը դարեր շարունակ եղած է քաջութեան, հաւատքի եւ հայրենասիրութեան խորհրդանիշ։ Անոր անունով օծուած սրբավայրերը մեր ժողովուրդին համար դարձած են ուխտատեղիներ ու ոգեղէն զօրացման կեդրոններ։ Այսօրուան տօնը առիթ մըն է վերարժեւորելու Սուրբ Գէորգի աւանդը եւ յիշելու մեր պատմութեան բոլոր Գէորգ անունով գործիչները՝ հոգեւոր, ազգային ու մշակութային տարածութեան մէջ։
Այս տօնին առիթով սրտագին շնորհաւորութիւն կ’ուղղենք Նոր Հաճընի Սուրբ Գէորգ եկեղեցւոյ հոգեւոր հովիւին ու թաղականութեան, Ս.Դ.Հ.Կ.-ի Լիբանանի շրջանի Վարիչ մարմինի մամլոյ դիւանապետ ընկեր Գէորգ Տաղլեանին, Գէորգ անունը կրող «Արարատ»ի ընթերցողներուն: Ոչ մէկը մտահան ընելու ճիգով, այսօր կը փափաքինք յիշատակել նաեւ պատմութեան մէջ երեւելի դեր ունեցած Գէորգները՝ հոգեւորականներէն մինչեւ գրողներ, ռազմական եւ մշակութային գործիչներ, ինչպիսիք՝ հայդուկապետ Գէորգ Չաուշ, ազգային վերածնունդի առաջնորդ՝ Գէորգ Աբովեան, բանաստեղծ, արձակագիր Գէորգ Էմին, գրող Գէորգ Կառվարենց (Արապաճեան), երգիչ Գէորգ Կակոսեան, երաժիշտ, մանկավարժ Գէորգ Գանտահարեան, եւ շա՜տ Գէորգներ, որոնց օրինակները մեզ ոգեշնչած ու հաւաքական միասնութիւն պարգեւած են ու տակաւին կը շարունակեն նուիրել։
Շնորհաւոր եւ բարեբեր Սուրբ Գէորգի տօն: Թող Սուրբ Զօրավարի բարեխօսութիւնը ամրապնդէ մեր հաւատքը հայ գիրին ու լեզուին եւ ներշնչէ նոր նուիրումի ոգի հանդէպ հայրենի պետութեան, սփիւռքահայոց միասնականութեան եւ հայ մամուլի յարատեւութեան։
