Հայաստանի վարչապետ Նիկոլ Փաշինեան Քրեմլինի մէջ տեսակցեցաւ Ռուսիոյ նախագահ Վլատիմիր Փութինի հետ: Վերջինս շնորհակալութիւն յայտնեց Փաշինեանին՝ հիւլէական արդիւնաբերութեան զարգացումին նուիրուած միջազգային ձեռնարկին մասնակցելու համար, այդ համարելով բնական, նկատի առնելով որ Հայաստանի ելեկտրականութեան մէկ երրորդը կ’արտադրուի հիւլէակայանին շնորհիւ: «Ռոսաթոմ ընկերութիւնը այժմ կ’աշխատի երկարաձգել Մեծամօրի հիւլէակայանին կեանքը», ըսաւ Փութին: Խօսելով Մոսկուա-Երեւան յարաբերութիւններուն մասին, նախագահը նշեց, որ անոնք ընդհանուր առմամբ լաւ կը զարգանան, իսկ Փաշինեան յայտնեց, թէ փոխադարձ առեւտուրին մէջ գրանցուած է որոշակի անկում: Վարչապետին համաձայն, հիւլէակայանին վերաբերեալ երկու կողմերուն միջեւ կայ աշխոյժ համագործակցութիւն: Փաշինեան Մոսկուայէն ուղղուեցաւ Նիւ Եորք՝ մասնակցելու համար ՄԱԿ-ի Ընդհանուր խորհուրդի 80-րդ նստաշրջանին:
