Վարչապետ Նաուաֆ Սալամ Ռաուշէի մէջ տեղի ունեցածը համարեց բացայայտ օրինախախտում, մանաւանդ որ հաւաքը կազմակերպողներուն տրուած արտօնութեան մէջ յստակօրէն արգիլուած էր Ռաուշէի լուսաւորումն ու անոր վրայ նկարներու ցուցադրումը: «Հաղորդակցեցայ ներքին գործերու, արդարադատութեան եւ պաշտպանութեան նախարարներուն հետ, պահանջելով անհրաժեշտ քայլեր ձեռնարկել՝ ձերբակալելու համար օրինախախտները եւ զանոնք հարցաքննել, որպէսզի կրեն իրենց արդար պատիժը», շեշտեց վարչապետը: Ընդհանուր դատախազութիւնը իր կարգին յայտարարեց, թէ ապահովութեան ուժերէն պահանջած է հարցաքննութեան կանչել Ռաուշէի օրինախախտները: Արդարադատութեան նախարարն ալ շեշտեց, թէ օրինախախտները պէտք է պատժուին, որովհետեւ օրէնքը բոլորին համար է, առանց բացառութեան: Սալամ աւելի ուշ վարչապետարանին մէջ գումարեց նախարարական խորհրդակցական հանդիպում մը՝ մասնակցութեամբ փոխվարչապետին եւ շարք մը նախարարներու: Փոխվարչապետ Թարէք Միթրի ժողովէն ետք յայտնեց, թէ վերահաստատած են կառավարական համախոհութիւնը եւ աշխատանքային ծրագրին մէջ ներառուած կէտերուն գործադրութեան նկատմամբ յանձնառութիւնը, մանաւանդ այն ինչ կը վերաբերի Լիբանանի ամբողջ տարածքին պետութեան հեղինակութեան ամրապնդումին: «Շեշտեցինք օրէնքները գործադրելու կարեւորութիւնը՝ բոլոր քաղաքացիներուն վրայ, առանց բացառութեան: Այս նպատակին հասնելու համար ապահովութեան ուժերը ունին մեծ պատասխանատուութիւն, որովհետեւ պետութիւնը խտրութիւն չի դներ քաղաքացիներուն կամ խմբաւորումներուն միջեւ», ըսաւ Միթրի: Ան Ռաուշէի մէջ նախանցեալ օր տեղի ունեցածը համարեց օրէնքի բացայայտ խախտում, շեշտելով կառավարութեան որոշումները գործադրելու անհրաժեշտութիւնը:
