Հայաստանի վարչապետ Նիկոլ Փաշինեան ընդունեց ամերիկեան Save Armenia կազմակերպութեան Երեւան այցելող պատուիրակութիւնը: Շնորհակալութիւն յայտնելով կազմակերպութեան ջանքերուն ու հայկական կառավարութեան հետ աշխոյժ համագործակցութեան համար, վարչապետը անդրադարձաւ հայ-ամերիկեան ռազմավարական գործընկերութեան, 8 Օգոստոսին Ուաշինկթընի մէջ Ատրպէյճանի հետ խաղաղութեան համաձայնագրի նախաստորագրումին, եւ թուեց անոր արդիւնքով ստեղծուած հնարաւորութիւնները:
Հայաստանի տնտեսութեան նախարար Գէորգ Պապոյեան իր կարգին յայտնեց, որ փակ սահմաններուն բացումը բազմաթիւ հնարաւորութիւններ պիտի ստեղծէ Հայաստանի համար: Ըստ նախարարին, մէկ կողմէ Հայաստանի, միւս կողմէ Թուրքիոյ եւ Ատրպէյճանի արտահանած նիւթերը նման չեն, հետեւաբար այս առումով խնդիր չկայ: «Մենք կը ներմուծենք այն ապրանքները, որոնք իրենք կ’արտահանեն, իսկ անոնք կը ներմուծեն մեր արտահանած ապրանքները», բացատրեց Պապոյեան:
