Սուրիոյ հարցով ամերիկացի պատուիրակ Թոմ Պարրաքի՝ Լիբանանի շահերուն հակասող եւ նոյնիսկ սպառնալիքներու հասնող վերջին յայտարարութիւնները կը մնան լիբանանցի պաշտօնատարներու կիզակէտին: Վարչապետ Նաուաֆ Սալամ զարմանք յայտնեց Պարրաքի խօսքերուն առնչութեամբ եւ վստահեցուց, որ լիբանանեան բանակը իր պարտականութիւնը կը կատարէ պետութեան գերիշխանութիւնը վերականգնելու հարցով: «Կառավարութիւնը յանձնառու կը մնայ իր աշխատանքային ծրագրին մէջ ստանձնած պարտականութիւններու կատարումին՝ մանաւանդ արմատական բարեկարգումներու իրագործումին եւ երկրի ամբողջ տարածքին պետութեան գերիշխանութիւնը պարտադրելուն», ըսաւ Սալամ: Անոր խօսքով, բանակը պիտի գործադրէ զէնքի մենաշնորհին հարցով 5 Սեպտեմբերին կառավարութեան մէջ յայտարարած ծրագիրը: Խորհրդարանի փոխնախագահ Էլիաս Պու Սաապ յայտնեց, թէ Սուրիոյ հարցով ամերիկացի պատուիրակ Թոմ Պարրաքի Լիբանանին վերաբերող յայտարարութիւնները համահունչ չեն շրջանին խնդիրները լուծելու ուղղութեամբ ներդրուած դիւանագիտական ջանքերուն հետ: Պու Սաապի համաձայն, կառավարութիւնը կ’ընթանայ ճշգրիտ ուղղութեամբ եւ ամերիկացի պատուիրակութիւնն է դիւրացնել լուծումը, ոչ թէ հակառակը:
