Լիբանանեան բանակը յայտարարեց, թէ իսրայէլեան ուժերը կը շարունակեն խախտել հարաւային զինադադարը եւ անցեալ տարուայ նոյեմբերեան համաձայնութենէն ի վեր կատարած է առնուազն 4500 խախտում: Նշելով, որ սահմանային Լապպունէ շրջանին մէջ յայտնաբերուած է իսրայէլեան լրտեսող սարք մը, բանակը ահազանգեց, թէ սահմանային բլուրներուն բռնագրաւումը եւ խախտումներուն շարունակութիւնը կը խոչընդոտեն հարաւի մէջ լիբանանեան բանակի տեղակայումի ծրագրին գործադրութիւնը: ԵՈՒՆԻՖԻԼ իր կարգին յայտարարեց, թէ Լիբանանի հարաւային շրջաններուն լայնածաւալ ռմբակոծումը կը համարուի ՄԱԿ-ի 1701 բանաձեւի բացայայտ խախտում, վտանգելով շրջանին փխրուն կայունութիւնը:
Իսրայէլեան բանակը նախանցեալ օր յայտարարած էր, թէ լայնածաւալ յարձակումներ կը գործէ Լիբանանի մէջ Հըզպալլայի զինուորական դիրքերուն դէմ: Բանակին համաձայն, Պաալպաքի մէջ ահաբեկուած է Հըզպալլային ի նպաստ զէնքի վաճառականութեամբ զբաղող Հըսէյն Սիվօ Շարիֆը: Առողջապահութեան նախարարութիւնը յայտարարեց, թէ հարաւային Թըպնին հիւանդանոցի մուտքին ինքնաշարժի մը թիրախաւորումէն կայ մահ մը եւ 11 վիրաւոր՝ ներառեալ երկու ծանր պարագաներ:
