Երկուշաբթի, 15 Սեպտեմբերին, «Արարատ» հիւրընկալեց Ս.Դ.Հ.Կ.-ի Լոս Անճելըսի շրջանի վաստակաշատ զոյգ մը՝ ընկեր Յարութ Պոյամեանն ու իր տիկինը՝ ընկերուհի Լուսին Պոյամեանը։ Հանդիպման ներկայ էին Ս.Դ.Հ.Կ.-ի Լիբանանի շրջանի Վարիչ մարմինի մամլոյ դիւանապետ՝ ընկեր Գէորգ Տաղլեանը եւ «Արարատ»ի Օժանդակ խորհուրդի անդամ՝ ընկերուհի Քրիսթին Շահինեանը։
Պոյամեան ամոլը շուրջ 46 տարուան բացակայութենէ ետք կրկին Լիբանան վերադարձած է՝ կարօտը մեղմելու եւ մէկամսեայ այցելութեամբ առիթ ունեցած է հանդիպելու Ս.Դ.Հ.Կ.-ի կառոյցները։ Ներկայ եղած են բազմաթիւ կուսակցական ու միութենական հանդիպումներու, ունեցած են առանձնազրոյցներ վարչական պատասխանատուներու հետ եւ իրենց հարուստ փորձառութենէն մեկնած փոխանցած են օգտակար խորհուրդներ։
Ընկեր Յարութիւն Պոյամեան, ԱՄՆ մեկնելէ առաջ, եղած է Տխրունի Ուսանողական Միութեան վարչական անդամ եւ մարտական պատասխանատու, յատկապէս քաղաքացիական պատերազմի սկզբնական շրջանին։ Ան յիշատակեց այդ օրերու միութենական ընկերները՝ Արսէն Տագէսեան, Անդրանիկ Ուղուրլեան, Վահէ Աջապահեան, Յովհաննէս Ճէրէճեան, Գրիգոր Խոտանեան եւ այլք։ Ամերիկայի մէջ ալ ան շարունակած է իր նուիրումը կուսակցական ու հասարակական կեանքին՝ նախ ղեկավարելով Լոս Անճելըսի «Սեդրակ Շահէն» մասնաճիւղը, իսկ ներկայիս կը վարէ Ս.Դ.Հ.Կ.-ի «Ստեփան Սապահ Գիւլեան» մասնաճիւղի ատենապետի պատասխանատու պաշտօնը։
Ընկերուհի Լուսին Պօզեան-Պոյամեան, ամուսնոյն կողքին, միշտ աշխոյժ մասնակից եղած է կուսակցա-միութենական աշխատանքներուն։ Ներկայիս ան գանձապահն է «Ստեփան Սապահ Գիւլեան» մասնաճիւղին, նաեւ կը վարէ ՀԿԲՄ-ի կրթանպաստի ֆոնտի գանձապահի պատասխանատու պաշտօնը։
Նշենք, որ իր գաղափարանուէր, վաստակաշատ եւ բացառիկ ծառայութիւններուն համար, ընկեր Յարութիւն Պոյամեան 2024-ի Մարտ 2-ին, հանդիսաւոր արարողութեամբ արժանացած է Ս.Դ.Հ.Կ.-ի բարձրագոյն պարգեւին՝ «Փարամազ» շքանշանին, ՍԴՀԿ Կեդրոնական վարչութեան ատենապետ` ընկ. տոքթ. Համբիկ Սարաֆեանի ձեռամբ։
Հանդիպումը «Արարատ»ի մէջ անցաւ ջերմ ու սիրալիր մթնոլորտի մէջ։ Պոյամեան ամոլը պատմեց իր յուշերը՝ յատկապէս քաղաքացիական պատերազմի դժուարին օրերէն, երբ Տխրունիի երիտասարդները «Արարատ» կը ցրուէին յատկապէս Ֆանարի եւ հեռաւոր շրջաններու ընկերներուն:
Արեւշատ խօսքով ելոյթ ունենալով, ընկեր Յարութիւն Պոյամեան ընդգծեց մամուլի կենսական դերը՝ շեշտելով, որ մամուլը «մեր լեզուն է» եւ յաւուր պատշաճի իր մաղթանքը փոխանցեց, որ «Արարատ»ը միացեալ ուժերով ու համագործակցութեամբ շարունակէ իր անխափան երթը։ Ան նաեւ բարձր գնահատեց Լիբանանի այս դժուարին օրերուն ձեռքբերումները եւ ըսաւ․ «Կը խոնարհիմ ձեր կատարած աշխատանքին առջեւ»։ Հիւրերը մեկնեցան «Արարատ»ի կողքին կանգնելու եւ զօրակցելու խոստումով։
Անմոռաց թող չմնայ նաեւ, որ Լիբանան այցելութեան առաջին օրերուն Պոյամեան ամոլը հազար ամերիկեան տոլարի, իրենց արտայայտութեամբ՝ «համեստ», նուիրատուութիւն մը կատարած էին «Արարատ»ի ֆոնտին։
