Միացեալ Նահանգներու նախագահ Տոնըլտ Թրամփ մեծ պատիւ համարեց հայ-ատրպէյճանական խաղաղութեան ջանքերուն օգնելը: Ան նշեց, որ վարչապետ Նիկոլ Փաշինեանին ու նախագահ Իլհամ Ալիեւին հետ իր բարեկամութիւնը յաւերժական կ’ըլլայ անձամբ իրեն համար, սակայն մանաւանդ Միացեալ Նահանգներուն համար: Թրամփ այս մասին գրեց համացանցին վրայ ու վերստին հրապարակեց իր լուսանկարը Փաշինեանին ու Ալիեւին հետ: Հայաստանի վարչապետ Նիկոլ Փաշինեան, իր կարգին, վերահաստատեց իր յանձնառութիւնը՝ աշխատիլ խաղաղութեան հաստատումին եւ Ուաշինկթընի մէջ կնքուած TRIPP (Թրամփի ուղի) ծրագիրը իրականացնելու ուղղութեամբ: Փաշինեան վերստին շնորհակալութիւն յայտնեց Թրամփին՝ հայկական եւ ատրպէյճանական կողմերուն միջեւ միջնորդելուն եւ համաձայնութեան յանգելու ուղղութեամբ թափած ջանքին համար: Ատրպէյճանի նախագահը եւս շնորհակալութիւն յայտնեց Թրամփին ու գնահատեց անոր դերը հայ-ատրպէյճանական խաղաղութեան հոլովոյթին մէջ:
