Հըզպալլա յայտարարեց, թէ երեսփոխան Մոհամմատ Ռաատ հանրապետութեան նախագահի խորհրդական Անտրէ Ռահհալի հետ արծարծած է երկրին շահերէն բխող կարգ մի թղթածրարներ՝ փոխըմբռնումի մթնոլորտի մէջ: Ճիշդ տարի մը անցած է Լիբանանի դէմ իսրայէլեան 2024-ի յարձակումին սկիզբ հանդիսացած «փէյճըրներու» հեռակառավարուած պայթեցումի գործողութենէն: Այս առիթով, Պէյրութի ծովեզերեայ Այն Մրէյսի շրջանէն բողոքի եըթ մը քալեց մինչեւ Մանարա, մասնակցութեամբ երեսփոխաններ Էլիաս Ժրատիի եւ Ռաէտ Պըրրոյի: Հըզպալլայի ընդհանուր քարտուղար շէյխ Նայիմ Քասէմ այս առիթով արտասանեց ուղերձ մը, որուն մէջ վստահեցուց, որ Իսրայէլ պիտի փլուզուի, որովհետեւ բռնագրաւող, անարդար եւ ոճրային ուժ մըն է, եւ որովհետեւ Դիմադրութիւնը պիտի շարունակէ պայքարը մինչեւ ազատագրում: 17-19 Սեպտեմբեր 2024-ի իսրայէլեան գործողութեան վիրաւորները Քասէմին յղուած նամակի մը մէջ վերահաստատեցին, որ իրենց նպատակն է վրէժը եւ պիտի շարունակեն Հըզպալլայի ընդհանուր նախկին քարտուղար սեյիտ Հասան Նասրալլայի ուղիով:
Իսկ Իսրայէլի պաշտպանութեան նախկին նախարար Եոավ Կալանթ յայտնեց, թէ իրենք ստիպուեցան ծրագրուածէն կանուխ պայթեցնել սարքերը, որովհետեւ Հըզպալլա կրնար յայտնաբերել ծրագիրն ու լարուած փէյճըրները:
