Տոհայի մէջ Համասի ղեկավարները ահաբեկելու իսրայէլեան փորձի լոյսին տակ, Քաթար հիւրընկալեց արաբական-մահմետական պետութիւններու արտակարգ գագաթաժողովը, որուն ընթացքին նշեալ երկիրներուն ղեկավարները քննարկեցին Տոհայի յարձակումը, Կազայի մէջ իրականացուող սպանդները, Լիբանանի եւ Սուրիոյ մէջ իսրայէլեան ոտնձգութիւնները եւ դիմակայելու միջոցները: Իր բացման խօսքին մէջ, Քաթարի Թամիմ պըն Համատ Ալ Սանի իշխանը դիտել տուաւ, որ Քաթար երկու տարի հանդէս եկած է միջնորդի դերով եւ իր մայրաքաղաքին մէջ հիւրընկալած է պաղեստինեան ու իսրայէլեան պատուիրակութիւններ, երաշխաւորելով 135 իսրայէլացի եւ հարիւրաւոր պաղեստինցի գերիներու ազատ արձակումը, թէեւ պատերազմը շարունակուած է: Ան յիշեցուց, որ վերջին հարուածի պահուն, Համասի ղեկավարները կ’ուսումնասիրէին Կազայի մէջ զինադադարի ամերիկեան առաջարկը: «Եթէ Իսրայէլ կ’ուզէ ահաբեկել Համասի քաղաքական ղեկավարութիւնը, ապա ինչո՞ւ կը բանակցի: Ինչո՞ւ մեր երկրին մէջ պիտի հիւրընկալենք իսրայէլացի բանագնացներ, եթէ նորէն երկիրը պիտի ահաբեկէ Համասի բանագնացները», հարց տուաւ իշխանը: Ան համոզում յայտնեց, որ իսրայէլեան կողմը կը ձգտի խափանելու բանակցութիւնները, Կազան վերածելու տարածքի մը, ուր կարելի չէ ապրիլ: Խօսելով Լիբանանի մասին, Քաթարի իշխանը կարծիք յայտնեց, որ Թել Աւիւ կը ձգտի երկրին մէջ հրահրելու քաղաքացիական պատերազմ մը, ինչպէս նաեւ պառակտելու Սուրիան: «Վստահ ենք, թէ Իսրայէլի տարածաշրջանային ծրագրերը պիտի ձախողին եւ ամէն ինչ պիտի ընենք՝ պաշտպանելու մեր գերիշխանութիւնը», շեշտեց Թամիմ պըն Համատ իշխանը: Քաթարի վարչապետն ալ իր խօսքին մէջ իսրայէլեան յարձակումը համարեց պետական ահաբեկչութիւն, ահազանգելով թէ այդպիսի ոճիրներով կարելի է միայն խափանել բանակցային հոլովոյթը: Նեթանիահու իր կարգին յայտնեց, որ Համասի ղեկավարութեան ոչնչացումը կարեւոր խոչընդոտ մը պիտի վերացնէ իսրայէլացի գերիներու ազատ արձակումի եւ պատերազմին վերջ տալու հոլովոյթէն:
