Արտաքին գործերու նախարար Եուսէֆ Ռեժժի յայտնեց, թէ ապօրինի զէնքին հարցը լուծելու առնչութեամբ լիբանանեան բանակին մշակած ծրագիրը կը նախատեսէ երեք ամիսներու ընթացքին ապազինել Լիթանի գետին հարաւային հատուածը: «AP» գործակալութեան տրուած զրոյցի մը մէջ Ռեժժի յայտնեց, թէ մինչեւ Նոյեմբերի աւարտը հարաւի մէջ պէտք չէ մնացած ըլլան զինամթերանոցներ, զէնքեր կամ զէնքի փոխադրութեան փորձեր: Միաժամանակ, բանակը Լիբանանի ամբողջ տարածքին պիտի գործադրէ ապահովական խիստ քայլեր, պիտի ամրացնէ անցարգելները, կանխէ զէնքերու փոխադրութիւնը եւ վերջ տայ զէնքով շրջագայելու երեւոյթին, սակայն առանց կատարելու խուզարկումներ կամ ձերբակալութիւններ: Ծրագրին մնացեալ չորս փուլերը կը ներառեն այլ շրջաններու մէջ ապազինում, սակայն ցարդ առանց յստակ պայմանաժամերու: Վարչապետ Նաուաֆ Սալամ աւելի ուշ նշեց, թէ բանակը իր ծրագրին գործադրութեան մասին ամէն ամիս պիտի զեկուցէ կառավարութեան:
Իսրայէլեան անօդաչու սարքերը ինքնաշարժ մը հարուածեցին Ժիյյէ շրջանին մէջ: Հարաւային Ատէյսէ գիւղին մէջ երէկ ջախջախուեցաւ իսրայէլեան անօդաչու սարք մը, մինչ լիբանանեան բանակը միջամտելով նախ ստուգեց զայն, ապա հեռացուց շրջանէն: Վարչապետ Նաուաֆ Սալամ յայտնեց, թէ ժամը հասած է լիբանանեան բանակին տրամադրելու իսկական օգնութիւն: Վարչապետը նշեց, որ արաբական եւ միջազգային կողմեր դրական գնահատած են կառավարութեան 5 Սեպտեմբերի նիստը, որուն ընթացքին քննարկուած էր զէնքի մենաշնորհի թղթածրարը:
