Ս. Իգնատիոս Մալոյեանի սրբադասման առթիւ կազմակերպուած միջոցառումներու ծիրը կ՚ընդգրկէր նաեւ դասական համերգի երեկոյ, որ նախաձեռնութիւնն էր Զմմառու Մայրավանքի վարչական հայրերուն։ Շաբաթ, 30 Օգոստոսի երեկոյեան ժամը 08։30-ին, Զմմառու վանքի Ս. Իգնատիոս Մալոյեանի անուան ամփիթատրոնին մէջ տեղի ունեցաւ դասական համերգի երեկոյ։
Համերգային ծրագիրը կ’ընդգրկէր հայ եւ աշխարհահռչակ դասականներու` Շուպերթի, Ճորտանոյի, Բուչչինիի, Վերտիի եւ այլոց… ինչպէս նաեւ Կանաչեանի եւ Տիգրանեանի յայտնի ստեղծագործութիւնները։
Ելոյթ ունեցան` Հայաստանէն ժամանած սոփրանօ Մէրի Մովսիսեանը եւ Լիբանանէն՝ թենոր Ճոնի Կէօքճեանը։
Ձեռնարկը ընթացք առաւ Մարալ Հարպոյեանի բացման խօսքով։ Ան ընդհանուր ակնարկ մը ընելէ ետք երաժշտութեան եւ անոր ունեցած ազդեցութեան մասին, պահ մը հրաւիրեց բոլոր ներկաները մուտք գործելու Մալոյեանի աշխարհ՝ ուր մշակոյթն ու հոգեւոր դաստիարակութիւնը հոգեւոր կոչման զուգահեռ ան վառ պահած է իր կեանքին եւ գործունէութեան մէջ։
Ընթացքին, Զմմառու Ս. Իգնատիոս Մալոյեան դպրեվանքի սան՝ եղբ. Փօլ Էմիշեան ընթերցեց Սուրբին խօսքերէն փունջ մը։ Իսկ Հայր Վարդան վարդապետը արաբերէնով տեղացի հանդիսատեսին համար հակիրճ ամփոփեց սուրբ Մալոյեանի կեանքին ազդեցիկ դրուագները։ Ապա, Ս. Փրկիչ եկեղեցւոյ «Արծիւեան» երգչախումբի անդամներէն քանի մը երիտասարդներ Ս. Իգնատիոս Մալոյեանի նուիրուած «Բազմաչարչար Նահատակ» հոգեւոր երգը երգեցին։
Ձեռնարկի աւարտին, Զմմառու Պատրիարքական Կղերի միաբանութեան Պատրիարքական փոխանորդ եւ Զմմառու վանքի Մեծաւոր Գերպծ. Մաշտոց Թ.Ծ.Վ. Զահթէրեան խօսք առնելով` բարձր գնահատեց միջոցառումը կազմակերպողներն ու երգիչները, որոնք իրենց անզուգական, թովիչ եւ դիւթիչ ձայնով լիբանանահայ հանրութեան հրամցուցին բարձրորակ արուեստ։ Ան Զմմառու Մայրավանքի զանգերու ղօղանջներուն ներքեւ բացագանչելով կոչ ուղղեց հայ հանրութեան նոր սկիզբի մը՝ որ ըլլայ Սարդարապատի զանգերուն հետ միասին դէպի նոր յաղթական երթի։ Ան անդրադարձաւ նոր սերունդի ճիշդ դաստիարակութեան կարեւորութեան, որպէսզի հայ ազգի ապագայի պատմութեան էջերուն մէջ ոսկէ տառերով արձանագրուին այդ յաղթանակները։
Մեծաւոր հօր «Պահպանիչ»-ով վերջ գտաւ երեկոն։
***
Նշենք, որ այս տարի 19 Հոկտեմբերին, Հայ կաթողիկէ եկեղեցին, աշխարհի կաթողիկէ հաւատացեալները եւ հայ ազգը ականատես պիտի ըլլան հոգեւոր եւ պատմական մեծութեան իրադարձութեան՝ հայ կաթողիկէ արքեպիսկոպոս, երանելի Իգնատիոս Մալոյեանի սրբադասման, որուն հանդիսաւոր արարողութիւնը տեղի պիտի ունենայ Վատիկանի մէջ։
Մալոյեանի սրբութեան ճանապարհը սկսած է Հայոց ցեղասպանութեան ժամանակ անոր նահատակութեան՝ Հռոմէական կաթողիկէ եկեղեցւոյ պաշտօնական ճանաչմամբ։ 1915 թուականի Յունիսին, օսմանեան իշխանութիւնները զայն ձերբակալած, տանջած եւ մահապատիժի ենթարկած են։ Ան մերժած է իսլամը ընդունիլ՝ նախընտրելով նահատակութեամբ հաստատել իր հաւատարմութիւնը Քրիստոսին:
