Յառաջիկայ Ուրբաթ օր կառավարութիւնը Պաապտայի պալատին մէջ պիտի գումարէ սպասուած նիստը՝ քննարկելու զէնքի մնաշնորհին թղթածրարը: Կը սպասուի, որ նիստին ընթացքին ներկայացուի եւ քննարկուի զէնքի մէնաշնորհին վերաբերեալ լիբանանեան բանակին մշակած ծրագիրը: Յիշեցնենք, որ 5 եւ 7 Օգոստոսի նիստերուն ընթացքին կառավարութիւնը վաւերացուցած էր զինեալ կազմակերպութիւնները՝ ներառեալ Հըզպալլան ապազինելու որոշումը, լիբանանեան բանակէն պահանջելով մշակել համապատասխան ծրագիր մը:
Հանրապետութեան նախագահ Ժոզէֆ Աուն այս հարցը քննարկեց Պէյրութի մէջ Ֆրանսայի դեսպանին հետ: Վերջինս տեղեկացուց, թէ Ֆրանսայի նախագահական պատուիրակ, արտաքին գործերու նախկին նախարար Ժան Իվ Լը Տրիան գալիք օրերուն պիտի այցելէ Պէյրութ՝ համակարգելու համար Լիբանանի վերակառուցումին եւ բանակին աջակցութեան նուիրուած երկու համագումարներուն նախապատրաստութիւնները:
