Լիբանանեան բանակը նախանցեալ օր հարաւի մէջ տուաւ երկու նահատակ եւս: Հրամանատարութիւնը հաղորդագրութեամբ մը յայտարարեց, թէ տասնապետ Մոհամմէտ Իսմայէլ եւ զինուոր Ռիֆաաթ Թուայմի նահատակուած են սահմանային Նաքուրա շրջանին մէջ, երբ պայթած է մանրազննումի ենթարկուող իսրայէլեան անօդաչու սարք մը, որ կարճ ժամանակ առաջ ջախջախուած էր նոյն շրջանին մէջ:
Հանրապետութեան նախագահ Ժոզէֆ Աուն եւ վարչապետ Նաուաֆ Սալամ ցաւակցեցան բանակի հրամանատարութեան եւ նահատակներու ընտանիքներուն, դիտել տալով, որ բանակը անգամ մը եւս արիւնով կը վճառէ հարաւին կայունութիւնը պահպանելուն գինը: Իսրայէլեան բանակի բանբերը միւս կողմէ յայտնեց, թէ Նաքուրայի մէջ ջախջախուած անօդաչու սարքին թիրախը լիբանանցի զինուորները չէին, այլ կը փորձէր հարուածել ի նպաստ Հըզպալլայի ամրաշինական աշխատանքներ կատարող բեռնակառք մը: Ըստ Աւիխայ Ատրահիի, իսրայէլեան օդուժը թիրախաւորած է Հըզպալլային պատկանող հրթիռային շարք մը դիրքեր ու ենթակառոյցներ, որոնց առկայութիւնը կը համարուի զինադադարի համաձայնութեան խախտում:
Իսկ երէկ, առողջապահութեան նախարարութիւնը յայտարարեց, թէ Նապաթիէ գաւառին ուղղութեամբ անօդաչու սարքի հարուածէն մահացած է մարդ մը:
Խորհրդարանի նախագահ Նեպիհ Պըրրի քննադատեց իր համաձայնութեամբ 2024-ի Նոյեմբերին Իսրայէլի հետ կնքուած զինադադարի պայմանաւորուածութիւնը: «Մեզի հետ կ’ուզեն վերաբերիլ որպէս պարտուած կողմ, սակայն այսուհետեւ մենք կը մերժենք պարզապէս որեւէ սակագին վճարել», պնդեց խորհրդարանի նախագահը:
