Հանրապետութեան նախագահ Ժոզէֆ Աուն նախանցեալ օր ընդունեց ամերիկեան վարչակազմի ներկայացուցիչ Թոմ Պարրաքն ու անոր ընկերակցող պատուիրակութիւնը: Նախագահական պալատէն հրապարակուած յայտարարութիւնը նշեց, թէ Աուն վերահաստատած է թշնամական գործողութիւնները դադրեցնելու համաձայնութեան Լիբանանի ամբողջական յանձնառութիւնը, ինչպէս նաեւ լիբանանեան-ամերիկեան աշխատանքային փաստաթուղթի գործադրութեան կառչածութիւնը: Ամերիկացի պատուիրակին տեղակալ Մորկըն Օրթէյկըս Պաապտայի պալատէն յայտնեց, թէ Իսրայէլ պատրաստ է քայլ մը առնելու լիբանանեան կառավարութեան առնելիք իւրաքանչիւր քայլին դիմաց: «Լիբանանի մէջ ժամը հասաւ գործնական քայլերու, իսկ մենք պատրաստ ենք օգնելու», շեշտեց Օրթէյկըս: Տեսակցելէ ետք լիբանանցի պետական բարձրաստիճան անձնաւորութիւններուն հետ, ամերիկեան պատուիրակութիւնը երէկ այցելեց հարաւային որոշ շրջաններ: Պարրաքն ու ընկերակիցները նախ ուղղաթիռով հասան Մարժաայունի զօրամաս, ուրկէ պիտի ուղղուէին Խիամ եւ Սուր: Պարրաքի այցելութենէն դժգոհ քաղաքացիներ փակեցին Խիամի հրապարակն ու բարձրացուցին Հըզպալլայի դրօշներ՝ դատապարտելով ամերիկեան քաղաքականութիւնը: Նոյնպէս հարաւի մէջ, իսրայէլեան ուժերը երէկ բացիկներ նետեցին Ատէյսէի ուղղութեամբ, որուն մէջ քաղաքացիները զգուշացուցին Հըզպալլայի հետ գործակցողի մը հետ որեւէ կապ ունենալէ: «Հեռացէք անկէ, այլապէս պիտի տուժէք դուք եւ ձեր ընտանիքները», նշուած է բացիկին մէջ:
