Խորհրդարանի նախագահ Նեպիհ Պըրրի ցաւ յայտնեց, որ Լիբանան այցելած ամերիկացի պատուիրակութիւնը դրժած է նախկին խոստումները եւ Իսրայէլի հետ «քայլ քայլի դիմաց» լուծումին փոխարէն վերստին պահանջած է Հըզպալլայի ապազինումը, որպէս իսրայէլեան կողմէն որեւէ քայլ առնելու նախապայման: Անոր համաձայն, ամերիկեան նորագոյն յայտարարութիւններու լոյսին տակ իրավիճակը վերստին բարդացած է: Խօսելով Հըզպալլան ապազինելու մասին լիբանանեան բանակին ծրագիրը քննարկող՝ կառավարութեան 2 Սեպտեմբերի նիստին մասին, Պըրրի դատապարտեց երկրին մէջ տարակարծութիւններու առաջնորդող որեւէ որոշում:
Հըզպալլայի ընդհանուր քարտուղարի քաղաքական հարցերու օգնական Հուսէյն Խալիլ դատապարտեց տարածաշրջանային եւ ամերիկացի պատուիրակներուն աշխուժութիւնը Լիբանանի մէջ, դիտել տալով, որ անոնց նորագոյն առաջարկները հակասական են անցեալ տարուայ Նոյեմբերին կնքուած զինադադարի համաձայնութեան եւ ամերիկեան կողմին ստանձնած պարտականութիւններուն՝ Իսրայէլին վրայ ճնշում բանեցնելու եւ լիբանանեան բռնագրաւեալ հողերէն իսրայէլեան ուժերուն նահանջը ապահովելու առումով: Ըստ Հըզպալլայի պատասխանտաուին, ամերիկեան վարչակազմը կը փորձէ տապալել լիբանանեան դիմակայումի բոլոր հնարաւորութիւնները, երկիրը մղելով Իսրայէլի հետ բնականոնացումի ընթացքին, հասնելով մինչեւ Աբրահամեան համաձայնութիւններ: «Ամերիկեան եւ տարածաշրջանային իշխանութիւնները յաջողեցան Լիբանանի կառավարութիւնը մղել թերի որոշումներու, որպէս վերջնական խոնարհումի առաջին քայլ», ցաւով նշեց Խալիլ եւ ահազանգեց լիբանանեան բանակը Դիմադրութեան եւ ժողովուրդին դէմ-յանդիման դնելու ամերիկեան դաւէն: «Լիբանանցի պատասխանատուները վերստին կը զուշացնենք այսպիսի մահացու թակարդներէն եւ հանրապետութեան նախագահէն ու պատուաւոր գործիչներէն կ’ակնկալենք վերջ տալ կառավարութեան այս զիջողական քաղաքականութիւններուն եւ բանակը զերծ պահել երկրին ապահովութիւնն ու կայունութիւնը վտանգող ներքին խռովութիւններէն», ահազանցեց Հուսէյն Խալիլ, մտավախութիւն յայտնելով երկիրը քաղաքացիական պատերազմի մղելու փորձերէն:
