Վարչապետ Նիկոլ Փաշինեան եւ նախագահ Վահագն Խաչատուրեան ներկայ գտնուած են օտարերկրեայ պետութիւններուն մէջ ՀՀ դիւանագիտական ներկայացուցչութիւններու ղեկավարներու տարեկան աշխատաժողովի մեկնարկին:
Վարչապետը հանդէս եկած է ելոյթով՝ կարեւորելով դիւանագիտական ներկայացուցչութիւններու առանցքային դերն ու նշանակութիւնը։ Իր խօսքին մէջ կառավարութեան ղեկավարը անդրադարձած է կառավարութեան կողմէ իրականացուող հաւասարակշռուած եւ հաւասարակշռման արտաքին քաղաքականութեան:
Երկրի ղեկավարը շեշտած է, որ անոր գործնական իրագործումը տեղի ունեցած է Օգոստոս 8-ին Ուաշինկթընի մէջ Հայաստանի եւ Ատրպէյճանի միջեւ խաղաղութեան հաստատմամբ:
Նիկոլ Փաշինեան անդրադարձած է ՀՀ արտաքին քաղաքականութեան հիմնարար ուղղութիւններուն, միջազգային յարաբերութիւններուն մէջ երկրի առաջնահերթութիւններուն եւ յառաջիկայ ծրագրերուն։
«Բոլոր այն աղէտները, որոնք մենք մեր պատմութեան ընթացքում ունեցել ենք, առանձնայատկութիւններն ուսումնասիրելիս եկել ենք մի արձանագրման, որ մենք որպէս կանոն այդպէս էլ չենք կարողացել մեր պատմութեան կշռոյթը համահունչ դարձնել միջազգային զարգացումների կշռոյթի հետ»,- աշխատաժողովի ժամանակ ըսած է ՀՀ վարչապետ Նիկոլ Փաշինեան:
Ըստ անոր՝ այն, ինչ Ուաշինկթընի մէջ տեղի ունեցած է, կը նշանակէ, որ ՀՀ քաղաքականութեան կշռոյթը դարձած է համահունչ միջազգային որոշակի գործընթացներու հետ, որ չափազանց կարեւոր է:
«Սա մեր, թերեւս, մի քանի հարիւրամեակների առաջին իրատեսական եւ իսկական հնարաւորութիւնն է դառնալ միջազգային զարգացումներին համահունչ, եւ սա չափազանց կարեւոր արձանագրում է»,- ըսած է ան:
Վարչապետի ելոյթին յաջորդած են արտաքին քաղաքականութեան օրակարգային հարցերու շուրջ քննարկումներ՝ առկայ հիմնախնդիրներու եւ անոնց լուծման հնարաւորութիւններուն վերաբերեալ:
