Հանրապետութեան նախագահ Ժոզէֆ Աուն կարեւորեց Լիբանանի պետութեան նկատմամբ լիբանանցիներուն եւ արտերկրին վստահութիւնը վերականգնելու անհրաժեշտութիւնը: «Լիբանան այս ուղղութեամբ սկսաւ ձեռնարկել որոշ քայլերու, որոնք դանդաղ են, սակայն կ’ընթանան ճշգրիտ ուղղութեամբ, նկատի առնելով խորհրդարանական սահմանափակումները», ըսաւ Աուն՝ Պաապտայի նախագահական պալատին մէջ ընդունած պատուիրակութիւններուն հետ զրուցած ատեն: Նախագահին խօսքով, միայն պետութիւնը կրնայ պահպանել Լիբանանն ու բոլոր յարանուանութիւնները, ուստի պէտք է յառաջ ընթանալ պետութեան նկատմամբ վստահութիւնը ամրապնդելու ջանքերով:
Խօսելով հարաւի վիճակին մասին, Աուն ամերիկացի ծերակուտական Տէրին Լահուտը ընդունած ատեն դիտել տուաւ, որ Պէյրութ այժմ կը սպասէ միջնորդ Թոմ Պարրաքի առաջարկներուն լիբանանեան մեկնաբանութիւններուն իսրայէլեան վերջնական պատասխանները: Աունի համաձայն, ամերիկացի միջնորդը Լիբանան պիտի այցելէ յառաջիկայ Երեքշաբթի եւ փոխանցէ իսրայէլեան որոշումները: Նախագահը կարեւորեց ԵՈՒՆԻՖԻԼ-ի խաղաղապահ առաքելութիւնը երկարաձգելու անհրաժեշտութիւնը, լիբանանցի գերիներուն անյապաղ ազատ արձակումը եւ հարաւի մէջ լիբանանեան բանակի տեղակայումին ամբողջացումը:
