Լիբանանեան բանակին հրամանատարութիւնը յայտարարեց, որ թմրանիւթերու վաճառականութեան դէմ պայքարի ծիրին մէջ, հետախուզական ծառայութիւնները խուզարկած են Պաալպաքի մերձակայ Զարազիր գիւղին մէջ թմրախոտով ցանուած այգիներ: Բանակը նաեւ կասկածելիներու բնակարաններ ներխուժած է Պաալպաքի Շարաուինէ թաղամասին մէջ, ուր յայտնաբերած եւ գրաւած է քափթակոն թմրանիւթը արտադրող սարքեր: Գործողութեան ընթացքին զինուորները ենթարկուած են կրակոցներու եւ նոյն միջոցներով հակադարձած:
Լիբանանեան բանակը այլ հաղորդագրութեամբ մը նշեց, թէ Պաալպաքի մերձակայ Նահլէի բարձունքներուն վրայ փրկած է աւազակախումբերուն ձեռամբ առեւանգուած սուրիացի մը: Գործողութեան ընթացքին բանակը ենթարկուած է կրակոցներու եւ հակադարձած նոյն միջոցներով, սպաննելով աւազակախումբին ղեկավարը, որուն եւ ձերբակալուած կասկածելիներուն հետ գտնուած է զէնք ու զինամթերք:
