ՄԱԿ-ն ու միջազգային շարք մը կազմակերպութիւններ՝ ներառեալ Առողջապահութեան համաշխարհային կազմակերպութիւնը, սնունդի համաշխարհային ծրագիրը եւ ԵՈՒՆԻՍԵՖ-ը պաշօնապէս յայտարարեցին, թէ Կազայի մէջ կը տիրէ սով, այդ համարելով աշխարհին համար ամօթալի երեւոյթ մը: ՄԱԿ-ի ընդհանուր քարտուղար Անթոնիօ Կութերեշ ցաւ յայտնեց, որ այս սովը մարդակերտ է, ոչ թէ բնական աղէտի հետեւանք: Իսկ UNRWA-ի գերագոյն յանձնակատար Ֆիլիփ Լազարինի ահազանգեց, որ սովը դիտումնաւոր է եւ ուղղակի հետեւանք՝ սննդանիւթերու մուտքը կանխող եւ մարդասիրական բեռներուն անցքերը
փակող իսրայէլեան քաղաքականութիւններուն:
Իսրայէլի Արտաքին գործերու նախարարութիւնը հաղորդագրութեամբ մը պնդեց, թէ Կազայի մէջ սով չկայ, սխալ համարելով Առողջապահութեան համաշխարհային կազմակերպութեան արժեւորումը եւ խոստանալով զայն նետել աղբանոց:
Իսրայէլի պաշտպանութեան նախարար Իսրայէլ Քաց յայտնեց, թէ «Կազայի մէջ դժոխքին դռները բաց պիտի մնան, մինչեւ որ Համաս համաձայնի պատերազմը աւարտելու իսրայէլեան նախապայմաններուն: Նախապէս, Իսրայէլի վարչապետ Պենիամին Նեթանիահու յայտնած էր, թէ հրահանգած է իսկոյն կատարել բանակցութիւններ՝ Թել Աւիւի նախապայմաններով վերջ տալու համար Կազայի պատերազմին եւ ապահովել իսրայէլացի գերիներուն ազատ արձակումը:
