Գործադրութեան դնելով լիբանանեան եւ պաղեստինեան կառավարութիւններուն միջեւ կնքուած համաձայնութիւնը, լիբանանեան բանակը նախանցեալ օր սկսաւ գաղթակայանները ապազինելու արշաւը: Առաջին կանգառը Պէյրութի հարաւային արուարձաններուն Պըրժ էլ-Պարաժինէ գաղթակայանն էր, ուր Ֆաթըհ շարժումին հետ առնչուած ուժեր յանձնեցին մեծամասնութեամբ միջին ծանրութեան զինատեսակներ: Այսուհանդերձ, իսլամական թեքում ունեցող պաղեստինեան ուժերը շեշտեցին, թէ համաձայնութիւնը իրենց չի վերաբերիր: Իսկ Հըզպալլայի հովանիին տակ գործող մուֆթի Ահմատ Քապալան դիտել տուաւ, թէ «Պըրժի գաղթակայանին մէջ կազմակերպուած բեմադրութիւնը պետութեան համար մեծ գայթակղութիւն է»:
Պաղեստինի նախագահութեան բանբեր Նապիլ Ապու Ռուտայնա յայտնեց, թէ Լիբանանի կառավարութեան հետ համաձայնաբար որոշուած է Լիբանանի պաղեստինեան գաղթակայաններուն մէջ տարածուած զէնքը որպէս աւանդ յանձնել լիբանանեան բանակին:
Հարաւի մէջ, Առողջապահութեան նախարարութիւնը յայտարարեց, թէ հարաւային Այթա Շաապ գիւղին ուղղութեամբ իսրայէլեան օդային յարձակումի մը պատճառով մահացած է քաղաքացի մը:
