Հանրապետութեան նախագահ Ժոզէֆ Աուն իր գրասենեակին մէջ հիւրընկալեց լիբանանեան բանակի հրամանատար զօրավար Ռուտոլֆ Հայքալը, որուն հետ արծարծեց լիբանանեան ապահովական վիճակը, հարաւի դրութիւնը, իսրայէլեան ոտնձգութիւնները եւ ապահովութիւնը հակակշիռի տակ պահելու հրամայականը: Աուն ընդունեց նաեւ Պետական անվտանգութեան ծառայութեան ընդհանուր տնօրէն զօրավար Էտկար Լաունտսը, որուն հետ քննարկեց ծառայութեան մանրամասնութիւնները եւ փտածութեան դէմ պայքարին ընթացքը:
Երէկ Պաապտա այցելեց Արաբական լիկայի ընդհանուր քարտուղարի օգնական Հուսամ Զաքին եւ Աունի հետ քննարկեց լիբանանեան ու շրջանային իրադարձութիւնները, ապօրինի զէնքի երեւոյթին վերջ տալու որոշումը եւ վերականգնումի լիբանանեան ծրագրերը: Աուն շեշտեց, թէ զէնքի մենաշնորհին հարցով կառավարութեան որոշումները փոխանցուած են բարեկամական պետութիւններուն ու ՄԱԿ-ին, վերահաստատելով որ Լիբանան յանձնառու կը մնայ նշեալ որոշումի գործադրութեան՝ պաշտպանելու համար լիբանանցիներն ու անոնց շահերը:
Վարչապետ Նաուաֆ Սալամ վարչապետարանին մէջ ընդունեց Լիբանանեան ուժեր կուսակցութեան նախագահ Սամիր Ժաաժահն ու երեսփոխան Սթրիտա Ժաաժահը: Ժողովականները արծարծեցին երկրին ընդհանուր վիճակը, պետութեան գերիշխանութիւնը ամրապնդելու, զինեալ կազմակերպութիւնները ապազինելու եւ զէնքի մենաշնորհին հարցը լուծելու հարցով կառավարութեան կարեւոր որոշումները: Սամիր Ժաաժահ համոզում յայտնեց, թէ «կառավարութեան որոշումները Լիբանանի մէջ վերականգնած են գործունեայ պետութեան տրամաբանութիւնը»: Երկու կողմերը շեշտեցին, որ ապազինումին մասին կառավարութեան որոշումներէն ետդարձ չկայ, այլ պիտի գործադրուին:
Խորհրդարանի նախագահ Նըպիհ Պըրրի Այն Թինէի մէջ ընդունեց Արաբական լիկայի ընդհանուր քարտուղարի օգնական Հուսամ Զաքին, որուն հետ քննարկեց լիբանանեան եւ շրջանային զարգացումները: Զաքի յայտնեց, որ Լիբանան կ’այցելէ գնահատելու համար զէնքի մենաշնորհին վերաբերեալ կառավարութեան որոշումը եւ զօրակցութիւն յայտնելու Պէյրութին: Ան պնդեց, թէ Իսրայէլ պէտք է յարգէ զինադադարի որոշումը եւ վերջ տայ լիբանանեան գերիշխանութիւնը խախտող ոտնձգութիւններուն: «Լիբանանի կայունութիւնը առաջնահերթ կարեւորութիւն կը համարուի Արաբական լիկային համար», հաւաստիացուց Զաքի, պահանջելով յաւելեալ ճնշում բանեցնել Թել Աւիւի վրայ, որպէսզի դադրին ոտնձգութիւնները:
