Հըզպալլա կառավարութեան որոշումը քննադատեց նոյնիսկ կառավարութեան նիստին ընթացքին: Հըզպալլայի հետեւորդներ հաւաքուեցան զանազան շրջաններու մէջ եւ քննադատեցին կառավարութեան որոշումը, երկրին բարձրաստիճան ղեկավարները համարելով Իսրայէլի գործակալներ: Աշխատանքի նախարար Մոհամմատ Հայտար պնդեց, որ իրենք զէնքի մասին պիտի չխօսին նախքան իսրայէլեան նահանջը լիբանանեան հողերէն եւ ոտնձգութիւններուն դադրեցումը:
«Հաւատարմութիւն դիմադրութեան» խորհրդարանական խմբակցութիւնը բողոքեց, որ կառավարութիւնը անտրամաբանականօրէն աճապարած էր իր որոշումին մէջ, իսկ վարչապետը խախտած էր Լիբանանի համախոհականութիւնը՝ վաւերացնելով ամերիկեան պահանջները: Երեսփոխան Իհապ Համատէ յայտնեց, թէ որոշումը գրուած է իսրայէլեան գրիչով, ամերիկեան թուղթի վրայ, «այդպէս ալ պիտի մնայ՝ թանաք թուղթի վրայ»: Երեսփոխան Ռաէտ Պըրրօ իր կարգին զգուշացուց, թէ կառավարութեան որոշումը կ’առաջնորդէ մարդոց հետ բախումի: Իսկ երեսփոխան Ալի Մոքտատ զգուշացուց «կրակով խաղալու վտանգէն»:
Շուտով սուր յայտարարութիւններով հանդէս եկան նաեւ շիի կրօնական գործիչներ: Շիիներու գերագոյն խորհուրդի փոխնախագահ շէյխ Ալի Խաթիպ հանրապետութեան նախագահին կոչ ուղղեց գումարելու ազգային երկխօսութեան նիստ մը՝ լուծելու համար այս խնդիրը:
Արտաքին գործերու նախարար Եուսէֆ Ռեժժի յայտնեց, թէ ինք կը նախընտրէ «զէնքներու յանձնում» եզրը, ոչ թէ «զէնքի մենաշնորհի վերականգնում»:
Լիբանանեան ուժերու երեսփոխաններէն Ղասսան Հասպանի յայտնեց, որ բանակին նկատմամբ Հըզպալլայի որեւէ ժխտական շարժում կուսակցութիւնը պիտի մեկուսացնէ բոլոր լիբանանցիներէն: Երեսփոխան Իհապ Մաթար յայտնեց, թէ նախագահին ու վարչապետին վրայ դրուած գրաւը ճիշդ էր, ակնկալելով յաւելեալ յանդուգն որոշումներ: Լիբանանեան ուժեր կուսակցութեան նախագահ Սամիր Ժաաժաա շեշտեց, թէ կառավարութեան որոշումին հրապարակումէն ետք զինեալ որեւէ կազմակերպութիւն կը համարուի ապօրինի: Երեսփոխան Սամի Ժմայէլ Հըզպալլային կոչ ուղղեց կառավարութեան որոշումին վերաբերեալ իր կեցուածքը ճշդելու համագործակցական մթնոլորտի մէջ:
Միջազգային մեկնաբանութիւններուն մէջ, Ծոցի արաբական երկիրներու համագործակցութեան կազմակերպութիւնը ողջունեց կառավարութեան որոշումը եւ զօրակցութիւն յայտնեց Լիբանանի գերիշխանութեան, ապահովութեան ու կայունութեան:
