Հըզպալլա յայտարարեց, թէ վարչապետ Սալամի կառավարութիւնը գործած է մեծ սխալ մը, երբ որոշած է Լիբանանը զրկել Իսրայէլէն պաշտպանող դիմադրութեան զէնքէն, որովհետեւ այս պիտի առաջնորդէ թուլութեան եւ իսրայէլեան գործողութիւններու շարունակութեան: «Ուստի, մենք այս որոշումին հետ պիտի վարուինք այնպէս՝ կարծես գոյութիւն իսկ չունի», նշուեցաւ Հըզպալլայի հաղորդագրութեան մէջ: Կուսակցութեան ընդհանուր քարտուղար Նայիմ Քասէմ իր կարգին յայտնեց, թէ Հըզպալլա կը մերժէ Իսրայէլի հետ որեւէ նոր համաձայնութիւն կնքել նախքան անցեալ տարուայ զինադադարի համաձայնութեան գործադրութիւնը: «Եթէ Իսրայէլ նոր պատերազմ շղթայազերծէ, ապա պիտի ենթարկուի հրթիռարձակումներու», սպառնաց Քասէմ: Հըզպալլայի երեսփոխաններէն Իհապ Համատէ յայտնեց, թէ իրենք զէնք յանձնելու դիրքի վրայ չեն, այդ մասին մտածողները որակելով «երեւակայողներ»:
Արտաքին գործերու նախարար Եուսէֆ Ռեժժի յայտնեց, թէ զէնքին հարցով կառավարութեան որոշումները վճռորոշ են ու վերջնական: «Այս հարցով ետդարձ պիտի չըլլայ, որովհետեւ ապօրինի զէնքին էջը փակելը լիբանանցիներուն պահանջն է», ըսաւ Ռեժժի: Արդարադատութեան նախարար Ատէլ Նասսար իր կարգին նշեց, թէ «ապօրինի զէնքը երկիրը մղած է պատերազմներու եւ Հըզպալլա չի կրնար շարունակել պետականաշինութեան խափանումը», ըսաւ նախարար Նասսար:
