Սուրիոյ Արտաքին գործերու նախարարութիւնը յայտարարեց, թէ Ռուսիոյ նախագահ Վլատիմիր Փութին վերահաստատած է իր երկրին պատրաստակամութիւնը՝ օգնելու Սուրիան վերակառուցելու ջանքերուն, կտրականապէս դատապարտելով երկիրը պառակտելու որեւէ փորձ: Նշենք, որ նախարար Ասաատ Շիպանի նախանցեալ օր պաշտօնական այցելութեամբ ժամանեց Մոսկուա, ուր տեսակցութիւններ ունեցաւ բարձրաստիճան ռուս պաշտօնատարներու հետ՝ քննարկելու երկկողմանի յարաբերութիւններն ու Սուրիոյ մէջ տիրող վիճակը:
Իսկ Սուրիոյ հարցով ամերիկացի պատուիրակ Թոմ Պարրաք յայտնեց, թէ Արտաքին գործերու նախարարութիւնը Սուրիան դուրս պիտի չբերէ ահաբեկչութեան զօրակցող երկիրներու սեւ ցանկէն, այլ առայժմ միայն պիտի հետեւի նախագահ Ահմատ Շարաայի վարչակազմի ջանքերուն, ըստ այնմ յաջորդ քայլերը ծրագրելու համար: Սուրիոյ Արդարադատութեան նախարարութիւնը որոշեց կազմել հարաւային Սուէյտայի մէջ տեղի ունեցած միջադէպերը հետաքննող մարմին մը՝ ճշդելու համար պատասխանատուութիւնները:
Այլ գիծի վրայ, թմրանիւթերու դէմ պայքարող կառոյցը Ներքին գործերու նախարարութեան ընկերակցութեամբ խուզարկումներ կատարեց Դամասկոսի գիւղական շրջաններուն մէջ, ուր Լիբանանի հետ սահմանին մօտ, քարայրի մը մէջ յայտնաբերեց Լիբանանէն մաքսանենգուած մեծածաւալ թմրանիւթի մթերանոց մը:
